ریاض: پاکستان کے فیلڈ مارشل اور چیف آف ڈیفنس فورسز سید عاصم منیر نے سعودی عرب کے وزیر دفاع شہزادہ خالد بن سلمان سے اہم ملاقات کی جس میں مشرقِ وسطیٰ کی تازہ سکیورٹی صورتحال اور ایران کی جانب سے کیے گئے ڈرون اور میزائل حملوں کے اثرات پر تفصیلی گفتگو کی گئی۔
پاک فوج کے شعبہ تعلقات عامہ (آئی ایس پی آر) کے مطابق یہ ملاقات سعودی عرب میں ہوئی جس میں دونوں رہنماؤں نے خطے میں بڑھتی ہوئی کشیدگی اور سکیورٹی چیلنجز پر تبادلہ خیال کیا۔
آئی ایس پی آر کے بیان کے مطابق ملاقات میں خاص طور پر ایران کی جانب سے کیے گئے ڈرون اور میزائل حملوں کے نتیجے میں پیدا ہونے والی صورتحال پر غور کیا گیا۔ اس دوران دونوں رہنماؤں نے اسٹریٹجک دفاعی معاہدے کے تحت مشترکہ اقدامات اور دفاعی تعاون کو مزید مؤثر بنانے کے حوالے سے بھی گفتگو کی۔
ملاقات کے دوران اس بات پر زور دیا گیا کہ بلاوجہ جارحیت خطے کی سکیورٹی اور استحکام کیلئے سنگین خطرہ بن سکتی ہے۔ دونوں رہنماؤں نے اس بات پر بھی اتفاق کیا کہ غیر ضروری حملے نہ صرف کشیدگی میں اضافہ کرتے ہیں بلکہ امن کیلئے جاری سفارتی اور مذاکراتی کوششوں کو بھی متاثر کرتے ہیں۔
آئی ایس پی آر کے مطابق ملاقات میں امید ظاہر کی گئی کہ ایران موجودہ صورتحال میں دانشمندی اور محتاط حکمت عملی کا مظاہرہ کرے گا۔ دونوں رہنماؤں نے اس بات کا اظہار کیا کہ ایران کی جانب سے محتاط رویہ اختیار کرنے سے دوست ممالک کو بحران کے پرامن حل کیلئے جاری کوششوں میں مدد مل سکتی ہے۔
بیان کے مطابق ملاقات میں علاقائی سکیورٹی، استحکام اور باہمی تعاون کے فروغ پر بھی تفصیلی تبادلہ خیال کیا گیا۔ پاکستان اور سعودی عرب نے اس عزم کا اعادہ کیا کہ دونوں ممالک خطے میں امن، استحکام اور مشترکہ مفادات کے تحفظ کیلئے اپنا تعاون مزید مضبوط بنائیں گے۔
ملاقات کے اختتام پر دونوں فریقین نے دفاعی، سکیورٹی اور سفارتی تعاون کو مزید وسعت دینے اور پاک سعودی برادرانہ تعلقات کو مزید مستحکم بنانے کے عزم کا اظہار بھی کیا۔
