وزیراعلیٰ پنجاب مریم نواز سے پاکستان میں تعینات بنگلہ دیش کے ہائی کمشنر اقبال حسین سے ملاقات

وزیراعلیٰ پنجاب مریم نواز سے پاکستان میں تعینات بنگلہ دیش کے ہائی کمشنر اقبال حسین خان نے ملاقات کی ملاقات میں دو طرفہ تعاون،باہمی تجارت، صنعت اور زراعت میں تعاون بڑھانے پر اتفاق کیا گیا۔

ملاقات کے دوران وزیر اعلیٰ پنجاب مریم نواز کا کہنا تھا کہ پاکستان اور بنگلہ دیش ایک ہی درخت کی دو شاخیں ہیں ہماری جڑیں مشترکہ تاریخ اور ثقافت میں پیوست ہیں۔پنجاب بنگلہ دیش کی گارمنٹس، مائیکروفنانس اور وویمن کی ورک فورس میں کامیابیوں کو قدر کی نگاہ سے دیکھتا ہے۔بنگلہ دیش سے ”وویمن فرسٹ“ایجنڈے کے تحت خواتین کی قیادت میں صنعتی کلسٹرز اور ڈیجیٹل اپ سکلنگ پروگرامز میں اشتراک کا خیر مقدم کیا جائے گا۔پنجاب اور بنگلہ دیش کے مابین زراعت اور فوڈ سکیورٹی کے شعبے میں بھی وسیع تعاون کی گنجائش ہے۔جنوری 2025ء میں ایم او یو کے تحت پنجاب نے بنگلہ دیش کو 50 ہزار ٹن اعلیٰ معیار کا چاول برآمد کر چکا ہے۔مریم نواز نے کہا کہ فارما اور میڈیکل ڈیوائسزکیلئے پنجاب بنگلہ دیش کو عالمی معیار کی لیبارٹریز، سرجیکل برآمدات سے سستی اور مشترکہ برانڈنگ کا موقع فراہم کر سکتا ہے۔بنگلہ دیش کی جانب سے ویزا کلیئرنس میں آسانی،انسپیکشن میں نرمی اور ڈھاکہ ایئرپورٹ سکیورٹی ڈیسک ختم کرنے جیسے اقدامات باہمی اعتماد کی نشانی ہے۔لاہور اور ڈھاکہ میں پاکستان بنگلہ دیش جوائنٹ چیمبر آف کامرس کے قیام کا خیرمقدم کرتے ہیں۔بنگلہ دیشی سرمایہ کاروں کو ون ونڈو بزنس سینٹرز کے ذریعے ہر ممکن سہولت فراہم کی جائے گی۔ویژن 2030 ء”ویمن فرسٹ“سمٹ میں شرکت ہمارے لیے اعزاز ہے۔ویژن 2030ء ”ویمن فرسٹ“سمٹ صرف سفارتی ملاقات نہیں بلکہ مشترکہ اقدار، باہمی احترام اور مستقبل پر مبنی دیرپا شراکت داری کی بنیاد ہے۔بنگلہ دیش کے ہائی کمشنر نے وزیراعلیٰ مریم نواز کے عوامی فلاحی اقدامات اور ڈویلپمنٹ کو سراہا۔