وفاقی وزیر داخلہ محسن نقوی کا کہنا ہے کہ یوم الحاق کشمیر تاریخ کی وہ روشن صبح ہے جب اہلِ کشمیر نے ڈوگرہ راج کے جبر کو مسترد کر کے پاکستان کو اپنی سیاسی اور روحانی منزل قرار دیا۔
یوم الحاق کشمیر پر اپنے پیغام میں محسن نقوی کا کہنا ہے کہ 19 جولائی 1947 کو کشمیریوں نے ایک ایسا فیصلہ کیا جو وقت کی گرد، ظلم کی دھند اور بندوقوں کی گونج میں بھی نہ مٹ سکا۔ قائداعظم محمد علی جناح نے واضح فرمایا: "کشمیر پاکستان کی شہ رَگ ہے” یہ اعلان آج بھی ہمارے قومی شعور کا مرکز ہے۔کشمیر کی فضاؤں میں آج بھی وہی صدائے یقین گونج رہی ہے جسے 1947 کے غیر مسلح مگر غیور کشمیریوں نے بلند کیا تھا۔محسن نقوی نے کہاکہ
بھارتی ریاست کا فوجی جبر، کالے قوانین اور انسانی حقوق کی پامالی کشمیریوں کی وفا کو توڑ سکے نہ جھکا سکے۔یوم الحاق کشمیر پر شہداء کو سلام پیش کرتے ہیں جنہوں نے پاکستان سے نظریاتی نسبت کو زندگی سے عزیز تر جانا۔اقوام متحدہ کی قراردادیں آج بھی منتظر ہیں کہ عالمی ضمیر جاگے اور کشمیریوں کو ان کا جائز حقِ خودارادیت فراہم کیا جائے۔حریت رہنماؤں کو جیلوں میں ڈال کر، زبانوں کو بند کر کے اور قبریں کھود کر بھی بھارت کشمیریوں کے دل سے پاکستان نہیں نکال سکا۔یوم الحاق کشمیر عالمی برادری کے لیے آئینہ ہے، جس میں اسے اپنی خاموشی، بےحسی اور دوہرے معیار کا چہرہ صاف دکھائی دینا چاہیے۔یوم الحاق کشمیر تجدیدِ عہد کا دن ہے کہ کشمیریوں کی قربانیاں ہم سب پر ایک امانت ہیں، جن کا قرض صرف آزادی ہے۔ انشاءاللہ وہ لمحہ دور نہیں جب بھارت سرکار کو کشمیریوں کے جائز حق کے سامنے سرتسلیم خم کرنا پڑے گا۔کشمیریوں کی تحریک آزادی میں پاکستان اپنے بھائیوں کی سفارتی۔ اخلاقی اور سیاسی حمایت جاری رکھے گا۔