وفاقی وزیر داخلہ محسن نقوی نے 78 ویں یوم آزادی پر اپنے خصوصی پیغام میں کہا ہے کہ پاکستان کے 78 ویں یوم آزادی پر پوری قوم کو دل کی گہرائیوں سے مبارکباد دیتا ہوں۔
ان کا کہنا ہے کہ یہ دن قربانیوں، جدوجہد اور آزادی کے خوابوں کی تعبیر کا دن ہے۔پاکستان اللہ تعالٰی کی بہت بڑی نعمت ہے، جس کی قدر ہر پاکستانی پر فرض ہے۔قائداعظم محمد علی جناح نے فرمایا: "پاکستان کا قیام مقدر تھا، یہ کسی کی بخشش نہیں بلکہ ہماری جدوجہد کا صلہ ہے۔” خون ۔ آنسو اور شہادتیں وہ قیمت تھی جو آزادی کے لیے ادا کی گئی، آج کا پاکستان انہی قربانیوں کی بنیاد پر قائم ہے۔ وفاقی وزیرداخلہ محسن نقوی نے کہا کہ آزادی کی شمع روشن کرنے کے لیے لاکھوں مسلمانوں کی بیش قیمت قربانیوں کو سلام۔ وطن کے امن و دفاع کی خاطر جانیں قربان کرنیوالے شہداء ہمارے ماتھے کا جھومر ہیں۔انکی عظیم قربانیوں کو قوم ہمیشہ یاد رکھے گی۔شہدائے وطن کے خاندانوں کے عزم اور حوصلے کو خراج تحسین پیش کرتا ہوں۔شہدائے وطن کے خاندان ہمارے اپنے خاندان ہیں۔ انہوں نے کہا کہ معرکۂ حق میں دشمن کو عبرتناک شکست دے کر پاکستان نے ثابت کیا کہ "ایمان، اتحاد، تنظیم” آج بھی ہماری طاقت، پہچان اور بقا کی سب سے بڑی ضمانت ہے۔ دشمن کو واضح اور بھرپور جواب دیا کہ یہ 2025 کا پاکستان ہے جو دفاع کی مکمل صلاحیت رکھتا ہے۔معرکہ حق کی فتح کے بعد یوم آزادی کی خوشیوں کو چار چاند لگ گئے ہیں۔پاکستان کا دفاع ناقابل تسخیر ہے اور کوئی دشمن پاکستان کی طرف میلی آنکھ سے نہیں دیکھ سکتا۔ایمان،اتحاد اور تنظیم جیسے سنہری اصول پاکستان کی ترقی و خوشحالی کے ضامن ہیں اور انشاءاللہ قوم ہر چیلنج سے سرخرو ہوکر نکلے گی۔ یوم آزادی پر پاکستان کے روشن مستقبل کے لیے نئے عزم اور نئی سوچ کے ساتھ آگے بڑھنے کے عزم کااعادہ کرتے ہیں۔
