لاہور:وزیراعلیٰ پنجاب مریم نواز شریف کی زیر صدارت صوبے میں محکمہ صحت سے متعلق اہم اجلاس منعقد ہوا، جس میں سرکاری و نجی میڈیکل اور ڈینٹل کالجز کی داخلہ پالیسی سمیت متعدد فیصلے کیے گئے۔ اجلاس میں میڈیکل ایجوکیشن، اسپیشلائزیشن، ہسپتالوں میں سہولیات اور مریضوں کو بہتر علاج فراہم کرنے کے لیے اہم اقدامات کی منظوری دی گئی۔
میڈیکل اینڈ ڈینٹل کالجز کی داخلہ پالیسی
• سرکاری میڈیکل کالجز میں داخلے کے لیے ایم ڈی کیٹ ٹیسٹ پاس کرنا لازمی ہوگا۔
• اوورسیز پاکستانیوں کے بچوں کے لیے ایم ڈی کیٹ ٹیسٹ فیس 10 ہزار ڈالر مقرر کرنے کا فیصلہ کیا گیا۔
• نجی میڈیکل کالجز کی لسٹ میں نام آنے پر امیدوار کو یونیورسٹی آف ہیلتھ سائنسز (UHS) میں ایک تہائی فیس جمع کرانا ہوگی۔
• یو ایچ ایس حتمی میرٹ لسٹ جاری ہونے کے بعد یہ فیس متعلقہ نجی میڈیکل یا ڈینٹل کالج کو منتقل کرے گی۔
• حتمی میرٹ لسٹ آنے کے بعد طلبہ کو باقی فیس براہِ راست متعلقہ کالج میں جمع کرانی ہوگی۔
پوسٹ گریجویٹ ٹریننگ اور اسپیشلائزیشن
• نجی اسپتالوں میں پوسٹ گریجویٹ ٹریننگ کے بعد لازمی سروس کی تجویز پر اتفاق کیا گیا۔
• سپیشلسٹ ڈاکٹرز کی ضرورت کے مطابق ٹرینی ڈاکٹروں کو نجی میڈیکل کالجز کے متعلقہ شعبوں میں اسپیشلائزیشن کے لیے بھیجا جائے گا۔
صحت کے شعبے میں دیگر فیصلے
• وزیراعلیٰ نے ساہیوال میں پہلی کامیاب انجیو پلاسٹی پر مسرت کا اظہار کیا اور کارڈیک سینٹر میں سرجری کے آغاز کو خوش آئند قرار دیا۔
• میو اسپتال میں ابلیشن سینٹر کے لیے مریضوں کے علاج کا فول پروف اور شفاف طریقہ کار وضع کرنے کی ہدایت دی۔
• کینسر کے مریضوں کو ہر ممکن ریلیف دینے پر زور دیا اور کہا کہ پنجاب میں کوئی غریب مریض علاج کے بغیر نہ رہے۔
• نئے میڈیکل کالجز کے لیے الگ عمارتیں تعمیر کرنے کے بجائے سرکاری یونیورسٹیوں میں میڈیکل بلاکس بنانے کی تجویز منظور کی گئی۔
• صوبے کے مختلف اداروں کے بورڈ آف مینجمنٹ کی بھی منظوری دی گئی۔
مریضوں کے لیے ریلیف اقدامات
وزیراعلیٰ مریم نواز شریف نے کہا:
“پنجاب کے ہر ہسپتال میں غریب مریض کو روپیہ خرچ کیے بغیر علاج کی سہولت ملنی چاہیے۔ میں چاہتی ہوں کہ کینسر کے ہر مریض کا علاج ممکن بنایا جائے۔”
مزید برآں، وزیراعلیٰ نے نواز شریف میڈیکل سٹی کے جلد قیام کے لیے ضروری اقدامات کرنے کی بھی ہدایت دی۔