کوالالمپور: وزیراعظم محمد شہباز شریف ملائیشیا کے سرکاری دورے پر کوالالمپور پہنچ گئے، جہاں انہیں شاہی پروٹوکول کے ساتھ خوش آمدید کہا گیا۔
کوالالمپور کے بنگا رایا بین الاقوامی ہوائی اڈے پر ملائیشیا کے وزیر اطلاعات و کمیونیکیشنز عزت مآب فہمی فاضل، ملائیشیا میں تعینات پاکستانی ہائی کمشنر سید احسن رضا شاہ اور سفارتی عملے نے وزیراعظم کا پرتپاک استقبال کیا۔
وزیراعظم کو شاہی پروٹوکول میں ان کی رہائش گاہ پہنچایا گیا، جہاں ملائیشیا کے وزیراعظم انور ابراہیم نے شہباز شریف کا گرمجوشی سے استقبال کیا۔
وزیراعظم شہباز شریف نے کہا کہ
“ملائیشیا آ کر بے حد خوشی ہو رہی ہے، میں ملائیشیا کے وزیراعظم کے پرتپاک استقبال پر ان کا تہہ دل سے شکرگزار ہوں۔”
انہوں نے کہا کہ اس دورے سے پاکستان اور ملائیشیا کے درمیان دوطرفہ تعلقات کو مزید تقویت ملے گی۔
وفاقی وزراء اور مشیران — نائب وزیراعظم و وزیر خارجہ اسحاق ڈار، وفاقی وزیر اطلاعات عطاءاللہ تارڑ اور وزیراعظم کے معاون خصوصی طارق فاطمی — بھی وزیراعظم کے ہمراہ ہیں۔
وزیراعظم پاکستان، وزیراعظم انور ابراہیم کی دعوت پر یہ دورہ کر رہے ہیں۔
دورے کے دوران دونوں رہنماؤں کی ون آن ون ملاقات اور وفود کی سطح پر بات چیت ہوگی۔
ذرائع کے مطابق، پاکستان اور ملائیشیا کے درمیان تعاون کے متعدد معاہدوں اور مفاہمتی یادداشتوں (MoUs) پر دستخط متوقع ہیں۔
بات چیت میں تجارت، آئی ٹی و ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر اور ڈیجیٹل معیشت میں دوطرفہ تعاون کو بڑھانے پر غور کیا جائے گا۔
علاوہ ازیں، دونوں ممالک عوامی روابط کے فروغ اور نئے تعاون کے مواقع تلاش کرنے پر بھی تبادلہ خیال کریں گے۔
حکومتی ذرائع کے مطابق وزیراعظم کا یہ دورہ پاکستان–ملائیشیا تعلقات کو مزید مستحکم اور مؤثر بنانے کے حوالے سے نہایت اہمیت کا حامل ہے
