پشاور: خیبرپختونخوا کے نومنتخب وزیراعلیٰ سہیل آفریدی نے اپنے عہدے کا حلف اٹھا لیا۔ حلف برداری کی تقریب گورنر ہاؤس پشاور میں منعقد ہوئی، جہاں گورنر فیصل کریم کنڈی نے ان سے وزیراعلیٰ کے عہدے کا حلف لیا۔
تقریب میں اسپیکر اور ڈپٹی اسپیکر صوبائی اسمبلی، سابق گورنر شاہ فرمان، اراکینِ سینیٹ، قومی و صوبائی اسمبلی کے اراکین، پی ٹی آئی کے صوبائی صدر جنید اکبر، مرکزی جنرل سیکرٹری سلمان اکرم راجا، چیف سیکرٹری خیبرپختونخوا شہاب علی شاہ، آئی جی پولیس ذوالفقار حمید، کمشنر پشاور سمیت مختلف صوبائی محکموں کے انتظامی سربراہان، سیاسی و سماجی شخصیات نے شرکت کی۔
ذرائع کے مطابق تقریب کے موقع پر گورنر فیصل کریم کنڈی کارکنوں کی دھکم پیل کے باعث سیڑھیوں سے گرنے سے بال بال بچ گئے۔ اسی دوران سہیل آفریدی کو بھی اسٹیج پر پہنچنے کے دوران کارکنوں کے دھکوں کا سامنا کرنا پڑا۔
پی ٹی آئی ذرائع کا کہنا ہے کہ پارٹی کے بانی عمران خان نے کابینہ کی تشکیل کا مکمل اختیار سہیل آفریدی کو دے دیا ہے۔ سہیل آفریدی منتخب نمائندوں یا پارٹی ٹکٹ ہولڈرز میں سے کابینہ ارکان کا انتخاب کریں گے۔
وزیراعلیٰ محمد سہیل آفریدی کا تعلق ضلع خیبر سے ہے۔ وہ 2024 کے عام انتخابات میں پی کے-70 ضلع خیبر سے خیبرپختونخوا اسمبلی کے رکن منتخب ہوئے۔
سہیل آفریدی ماضی میں انصاف اسٹوڈنٹس فیڈریشن (ISF) خیبرپختونخوا کے صدر بھی رہ چکے ہیں، بعدازاں انہیں پی ٹی آئی کی مرکزی ایگزیکٹو کمیٹی میں شامل کیا گیا۔
موجودہ حکومت میں سہیل آفریدی کو ابتدا میں وزیراعلیٰ کے معاونِ خصوصی برائے کمیونیکیشن اینڈ ورکس (C&W) تعینات کیا گیا تھا، جبکہ بعد میں کابینہ میں رد و بدل کے دوران انہیں وزیر برائے ہائر ایجوکیشن کا قلمدان دیا گیا۔
