وزیراعظم شہباز شریف کی زیر صدارت وفاقی کابینہ کا اجلاس — شرم الشیخ میں پاکستان کو بے پناہ عزت ملی: وزیراعظم

اسلام آباد: وزیراعظم محمد شہباز شریف کی زیرِ صدارت وفاقی کابینہ کا اجلاس آج وزیراعظم ہاؤس اسلام آباد میں منعقد ہوا۔

اجلاس میں وفاقی کابینہ کے اراکین نے غزہ امن معاہدے میں وزیراعظم محمد شہباز شریف کے انتہائی اہم اور مؤثر کردار پر انہیں زبردست خراجِ تحسین پیش کیا۔ کابینہ اراکین نے شرم الشیخ، مصر میں منعقد ہونے والے غزہ امن سربراہی اجلاس میں وزیراعظم کی تاریخی تقریر اور سفارتی کاوشوں کو بھرپور سراہا اور ڈیسک بجا کر وزیراعظم کو داد دی۔

وزیراعظم شہباز شریف نے کابینہ کے اراکین کا شکریہ ادا کرتے ہوئے کہا کہ

“شرم الشیخ میں اللہ تعالیٰ نے پاکستان کو بے پناہ عزت دی۔ پاکستان نے غزہ امن معاہدے میں انتہائی اہم کردار ادا کیا۔ معرکہءِ حق کے بعد دنیا نے پاکستان کو ایک اہم ملک کے طور پر دیکھنا شروع کیا ہے۔ ہم اللہ تعالیٰ کا جتنا شکر ادا کریں کم ہے کہ اس نے دنیا بھر میں پاکستان کو عزت و تکریم سے نوازا۔”

قانون سازی سے متعلق کابینہ کے فیصلے

وفاقی کابینہ نے کابینہ کمیٹی برائے قانون سازی (CCLC) کے مختلف اجلاسوں میں کیے گئے فیصلوں کی توثیق کی، جن کی تفصیل درج ذیل ہے:

✅ 23 ستمبر 2025 کے اجلاس کے فیصلوں کی توثیق:
• ٹریڈ آرگنائزیشن رولز 2013 کے شیڈول (E) میں ترامیم کی منظوری،
جن کے تحت ملک بھر میں خواتین کے چیمبرز آف کامرس اینڈ انڈسٹری کے لائسنس گرانٹ فیس اور تجدید فیس میں کوئی اضافہ نہیں کیا جائے گا۔
• انٹر بورڈ کوآرڈینیشن کمیشن ایکٹ 2023 میں ترامیم کی توثیق،
جن کے تحت تمام تعلیمی بورڈز میں خواتین کی 33 فیصد نمائندگی لازمی قرار دی گئی۔
• جموں و کشمیر (ایڈمنسٹریشن آف پراپرٹی) آرڈیننس 1961،
کراچی پورٹ ٹرسٹ ایکٹ 1886، گوادر پورٹ اتھارٹی آرڈیننس 2002
اور پورٹ قاسم ایکٹ 1973 کو SOEs ایکٹ 2023 سے ہم آہنگ کرنے کے لیے ترامیم کی منظوری۔

✅ 8 اکتوبر 2025 کے اجلاس کے فیصلوں کی توثیق:
• پاکستان ڈیجیٹل اتھارٹی (مینجمنٹ اینڈ یوٹیلائزیشن آف ڈیجیٹل نیشن فنڈ) رولز 2025 کی منظوری۔
• ادارہ شماریات پاکستان کی گورننگ کونسل میں ترامیم کی توثیق۔

✅ 10 اکتوبر 2025 کے اجلاس کے فیصلوں کی توثیق:
• آرمڈ فورسز نرسنگ سروسز رولز 1969 میں ترامیم کی منظوری۔
• سول ان مینڈ (Civil Unmanned) ایئر کرافٹ رولز 2025 کی منظوری۔
• پاسپورٹ امینڈمنٹ رولز 2021 میں ترامیم کی توثیق۔

کابینہ نے مختلف وزارتوں اور محکموں کی جانب سے پیش کیے گئے دیگر انتظامی امور اور پالیسی معاملات پر بھی غور کیا اور متعلقہ سفارشات کی منظوری دی۔