افغانستان اب بھارت کی پراکسی بن گیا ہے، دہشت گردی کی جنگ بھارت، افغانستان اور ٹی ٹی پی نے پاکستان پر مسلط کی ہے: خواجہ آصف

اسلام آباد: وزیر دفاع خواجہ آصف نے کہا ہے کہ افغانستان اب بھارت کی پراکسی کے طور پر کام کر رہا ہے، اور دہشت گردی کی یہ جنگ بھارت، افغانستان اور تحریکِ طالبان پاکستان (ٹی ٹی پی) نے مل کر پاکستان پر مسلط کی ہوئی ہے۔

خواجہ آصف نے کہا کہ کابل کے حکمران بھارت کی گود میں بیٹھ کر پاکستان کے خلاف سازشیں کر رہے ہیں، حالانکہ کل تک یہی لوگ پاکستان کی پناہ میں تھے اور ہماری سرزمین پر چھپتے پھرتے تھے۔

انہوں نے کہا کہ پاکستان اب کابل کے ساتھ تعلقات ماضی کی طرح برقرار رکھنے کا متحمل نہیں ہو سکتا۔ تمام افغان شہریوں کو اپنے وطن واپس جانا ہوگا کیونکہ اب کابل میں ان کی اپنی حکومت ہے اور اسلامی انقلاب کو پانچ سال گزر چکے ہیں۔

وزیر دفاع نے کہا کہ افغانستان کو پاکستان کے ساتھ ایک ہمسایہ ملک کی طرح رہنا ہوگا۔ ہماری زمین اور وسائل 25 کروڑ پاکستانیوں کی ملکیت ہیں۔ پانچ دہائیوں کی زبردستی کی مہمان نوازی کے خاتمے کا وقت آ گیا ہے۔ انہوں نے کہا کہ خوددار قومیں بیگانی سرزمین اور وسائل پر نہیں پلتیں۔

خواجہ آصف نے واضح کیا کہ اب احتجاجی مراسلے اور امن کی اپیلیں نہیں ہوں گی، نہ ہی کابل وفود بھیجے جائیں گے۔ دہشت گردی کا منبع جہاں بھی ہوگا، اسے بھاری قیمت ادا کرنا پڑے گی۔

وزیر دفاع نے بتایا کہ طالبان کے 2021 میں اقتدار سنبھالنے کے بعد سے پاکستان نے امن اور سرحد پار دراندازی روکنے کے لیے متعدد کوششیں کیں۔ ان کے مطابق وزیر خارجہ نے کابل کے 4، وزیر دفاع اور آئی ایس آئی حکام نے 2، نمائندہ خصوصی اور سیکریٹری نے 5، جبکہ نیشنل سکیورٹی ایڈوائزر نے ایک دورہ کیا۔ اس کے علاوہ جوائنٹ کوآرڈینیشن کمیٹی کے 8 اجلاس بھی منعقد ہوئے۔

انہوں نے مزید بتایا کہ اب تک 225 بارڈر فلیگ میٹنگز، 836 احتجاجی مراسلے اور 13 ڈیمارش کیے جا چکے ہیں۔

خواجہ آصف کے مطابق 2021 سے اب تک ملک میں 10 ہزار 347 دہشت گردی کے واقعات پیش آئے، جن میں 3 ہزار 844 افراد شہید ہوئے۔ ان شہداء میں سول شہری، فوجی اہلکار اور قانون نافذ کرنے والے اداروں کے ارکان شامل ہیں۔

انہوں نے کہا کہ گزشتہ پانچ سال میں پاکستان کی کوششوں اور قربانیوں کے باوجود کابل سے کوئی مثبت ردعمل سامنے نہیں آیا۔