خانیوال: وزیراعظم محمد شہباز شریف نے خانیوال کا دورہ کیا اور مسلم لیگ (ن) کے سینئر رہنما و سابق صوبائی وزیر مرحوم حاجی عرفان احمد خان ڈاھا کے انتقال پر گہرے رنج و غم کا اظہار کیا۔
وزیراعظم نے مرحوم کے صاحبزادے، رکنِ قومی اسمبلی محمد خان ڈاھا سے ملاقات کی اور مرحوم کے ایصالِ ثواب کے لیے فاتحہ خوانی کی۔ اس موقع پر وزیراعظم نے مرحوم کے اہلِ خانہ سے دلی تعزیت کی اور ان کے سیاسی و سماجی خدمات کو خراجِ عقیدت پیش کیا۔
وزیراعظم شہباز شریف نے کہا کہ مرحوم حاجی عرفان احمد خان ڈاھا مسلم لیگ (ن) کے سرگرم کارکن، وفادار ساتھی اور جنوبی پنجاب کی سیاست میں مضبوط آواز تھے۔
انہوں نے مزید کہا کہ مرحوم نے ہر مشکل وقت میں پارٹی قیادت کا ساتھ دیا اور عوامی خدمت کو اپنا مشن بنایا۔
وزیراعظم نے کہا کہ مسلم لیگ (ن) مرحوم حاجی عرفان خان ڈاھا کی پارٹی اور عوام کے لیے خدمات کو قدر کی نگاہ سے دیکھتی ہے، ان کی قربانیوں اور خدمات کو ہمیشہ یاد رکھا جائے گا۔
وزیراعظم کے ہمراہ وفاقی وزیر اطلاعات و نشریات عطاء اللہ تارڑ، وزیر مملکت عبد الرحمن کانجو، معاونِ خصوصی طلحہ برکی اور اسپیکر پنجاب اسمبلی ملک احمد خان بھی موجود تھے۔
اس موقع پر ارکانِ قومی و صوبائی اسمبلی، پارٹی ٹکٹ ہولڈرز اور مقامی رہنما بھی شریک ہوئے جن میں رانا محمد سلیم حنیف، چوہدری عثمان فضل، سابق ایم این اے ملک عبدالغفار ڈوگر، ذوہیب احمد خان ڈاھا اور میاں اکرام اللہ کمبوہ شامل تھے۔
