اسلام آباد: وزیراعظم محمد شہباز شریف کی زیر صدارت پاور ڈویژن کے اصلاحاتی پیکج پر اہم جائزہ اجلاس ہوا، جس میں ملک میں بجلی کی پیداوار کے مؤثر استعمال اور صنعت و زراعت کے فروغ سے متعلق پالیسی سفارشات پر تفصیلی غور کیا گیا۔
اجلاس میں وفاقی وزیر برائے توانائی سردار اویس خان لغاری، وفاقی وزیر برائے اطلاعات و نشریات عطاء اللہ تارڑ، وفاقی وزیر برائے اکنامک افیئرز ڈویژن احد خان چیمہ، مشیر برائے صنعت ہارون اختر اور متعلقہ اعلیٰ حکام نے شرکت کی۔
وزیراعظم کو پاور ڈویژن کی جانب سے ملک میں بجلی کی پیداوار اور اس کے جامع و مؤثر استعمال پر مبنی ممکنہ اصلاحاتی پیکج پر بریفنگ دی گئی۔
وزیراعظم شہباز شریف نے اجلاس سے خطاب کرتے ہوئے کہا کہ:
“ملکی صنعتی پیداوار میں اضافے کے لیے پاور ڈویژن جامع اور مؤثر پالیسی سفارشات تشکیل دے۔”
انہوں نے ہدایت دی کہ صنعتی پیداوار سے متعلقہ تمام ادارے صنعتکاروں اور سرمایہ کاروں کو سہولت فراہم کرنے کے لیے ہر ممکن اقدامات کریں۔
وزیراعظم نے کہا کہ حکومت کی اولین ترجیحات میں زراعت اور صنعت کے شعبے کو ہر ممکن سہولت فراہم کرنا شامل ہے۔ ان کے مطابق، ملک میں بجلی کی پیداوار کا مثبت اور مؤثر استعمال صنعتی مصنوعات اور زرعی پیداوار میں نمایاں اضافہ کا سبب بن سکتا ہے۔
وزیراعظم نے وفاقی وزارتِ توانائی کو ہدایت کی کہ وہ بجلی کی پیداوار کے بہترین استعمال کے لیے جامع حکمتِ عملی تیار کرے، تاکہ صنعتی سرگرمیوں کو فروغ ملے اور ملکی معیشت مضبوط ہو۔
اجلاس میں پاور ڈویژن کے جاری اصلاحاتی ایجنڈے، بجلی کے بہتر انتظام، توانائی کے ضیاع میں کمی، اور بجلی کی صنعتی و زرعی شعبوں میں منصفانہ تقسیم پر بھی تفصیلی گفتگو ہوئی۔
