کراچی: ترجمان وفاقی حکومت برائے سندھ راجہ خلیق انصاری نے اعلان کیا ہے کہ کراچی گرین لائن منصوبے پر کام جلد دوبارہ شروع کیا جا رہا ہے۔
انہوں نے کہا کہ وزیراعظم ہاؤس میں منعقدہ اجلاس میں گرین لائن سے متعلق تمام امور پر تفصیلی گفتگو ہوئی ہے اور بلدیاتی حکومت کی نشاندہی کردہ ادھورے کاموں کو جلد مکمل کیا جائے گا۔
منصوبہ اب ستمبر 2026 میں مکمل ہوگا
راجہ خلیق انصاری نے بتایا کہ ایک ماہ کی تاخیر کے باعث منصوبے کی تکمیل کی نئی تاریخ ستمبر 2026 مقرر کی گئی ہے۔
ان کا کہنا تھا کہ منصوبے کے تحت کیپری سنیما، پلازہ اور جامع کلاتھ کے قریب ایک نیا اسٹیشن تعمیر کیا جائے گا جبکہ گرین لائن کا اختتام جامع کلاتھ کے قریب ہی ہوگا۔
این او سی سے متعلق وضاحت
ترجمان نے کہا کہ میئر کراچی کا خیال تھا کہ منصوبے کے لیے این او سی حاصل نہیں کیا گیا، تاہم
“یہ این او سی 2017 میں حاصل کی گئی تھی اور اس وقت میئر صاحب عہدے پر نہیں تھے۔ چونکہ این او سی پر کوئی معیاد مقرر نہیں تھی، اس لیے وہ اب بھی قابلِ عمل ہے۔”
اسٹیٹ آف دی آرٹ کینٹ اسٹیشن کا افتتاح 31 اکتوبر کو
راجہ خلیق انصاری نے مزید بتایا کہ 31 اکتوبر کو کراچی کینٹ اسٹیشن پر جدید طرز کے “اسٹیٹ آف دی آرٹ” اسٹیشن کا افتتاح کیا جائے گا۔
انہوں نے کہا:
“کینٹ اسٹیشن آ کر شہریوں کو یوں محسوس ہوگا جیسے وہ کسی ائیرپورٹ میں داخل ہو گئے ہوں۔”
کراچی کے دیگر منصوبوں پر بھی بات
ترجمان کا کہنا تھا کہ وفاقی حکومت کراچی کے زیرتعمیر منصوبوں میں بلدیاتی حکومت کی ہر ممکن مدد کے لیے تیار ہے۔
انہوں نے واضح کیا کہ
“لیاری ایکسپریس وے پر اس وقت صرف مینٹی ننس کا کام جاری ہے اور یہ منصوبہ پہلے کی طرح چلتا رہے گا۔”