راولپنڈی: انسدادِ دہشت گردی عدالت راولپنڈی نے ایک بار پھر چیئرمین پی ٹی آئی عمران خان کی ہمشیرہ علیمہ خان کے ناقابلِ ضمانت وارنٹ گرفتاری جاری کرتے ہوئے ان کے ضمانتی مچلکے ضبط کرنے کا حکم دے دیا۔
تفصیلات کے مطابق، علیمہ خان سمیت 11 ملزمان کے خلاف 26 نومبر کے احتجاج پر درج مقدمے کی سماعت انسدادِ دہشت گردی عدالت کے جج امجد علی شاہ نے کی۔
عدالت میں علیمہ خان پیش نہ ہوئیں، جبکہ مقدمے میں نامزد دیگر 10 ملزمان عدالت میں پیش ہوئے۔
عدالت نے علیمہ خان کی غیر حاضری پر ایک لاکھ روپے کے ضمانتی مچلکے بحقِ سرکار ضبط کرنے کا حکم دیا اور ان کے ضامن عمر شریف کو شوکاز نوٹس جاری کر دیا۔
مزید یہ کہ عدالت نے ضامن کو 24 اکتوبر تک جواب جمع کرانے کی ہدایت کرتے ہوئے علیمہ خان کو 10، 10 لاکھ روپے کے دو نئے ضمانتی مچلکے جمع کرانے کا حکم دیا۔
سماعت کے دوران عدالت نے ایس پی راول محمد سعد اور ڈی ایس پی نعیم کو بھی توہینِ عدالت کا شوکاز نوٹس جاری کیا اور ان کی جانب سے علیمہ خان کے روپوش ہونے سے متعلق رپورٹ کو بوگس قرار دیا۔
فاضل جج نے ریمارکس دیے کہ “اگر علیمہ خان روپوش ہیں تو **اڈیالہ جیل کے باہر ان کی میڈیا ٹاک کیسے نشر ہوتی ہے؟”
عدالت نے مقدمے میں شامل چار گاڑیوں کے 85 لاکھ روپے کے شیورٹی بانڈز بھی ضبط کر لیے، جنہیں قبل ازیں ملزمان نے سپرداری پر حاصل کیا ہوا تھا۔
ساتھ ہی عدالت نے آئی جی خیبر پختونخوا اور آئی جی بلوچستان کو حکم دیا کہ گاڑیاں ضبط کر کے عدالت میں پیش کی جائیں۔
انسدادِ دہشت گردی عدالت نے مقدمے کی مزید سماعت 24 اکتوبر تک ملتوی کر دی۔
