اسلام آباد: وفاقی وزیر داخلہ محسن نقوی نے اعلان کیا ہے کہ خیبرپختونخوا حکومت کی جانب سے واپس کی جانے والی بلٹ پروف گاڑیاں اب بلوچستان حکومت کو فراہم کی جائیں گی۔
وزیراعلیٰ بلوچستان سرفراز بگٹی نے سوشل میڈیا کے ذریعے وفاقی وزیر داخلہ سے درخواست کی تھی کہ خیبرپختونخوا حکومت کی جانب سے واپس کی جانے والی بلٹ پروف گاڑیاں بلوچستان کو دی جائیں تاکہ صوبے میں دہشت گردی کے خلاف سیکیورٹی اقدامات کو مزید مؤثر بنایا جا سکے۔
وزیراعلیٰ کی درخواست پر وفاقی وزیر داخلہ محسن نقوی نے فوری ردعمل دیتے ہوئے اعلان کیا کہ خیبرپختونخوا سے واپس آنے والی بلٹ پروف گاڑیاں بلوچستان کو منتقل کی جائیں گی۔
دوسری جانب، وزیراعلیٰ خیبرپختونخوا سہیل آفریدی نے وفاقی وزیر داخلہ کی جانب سے فراہم کردہ بلٹ پروف گاڑیاں واپس کرنے کی ہدایت دی تھی۔
ان کا کہنا تھا کہ وفاق کی جانب سے دی جانے والی بلٹ پروف گاڑیاں ناقض اور پرانی ہیں، جو خیبرپختونخوا پولیس کی تضحیک کے مترادف ہے۔ سہیل آفریدی نے کہا کہ ان گاڑیوں کو واپس کیا جائے اور سابق وزرائے اعلیٰ سے لی گئی سیکیورٹی واپس بحال کی جائے تاکہ ان کا تحفظ یقینی بنایا جا سکے۔
وزیراعلیٰ خیبرپختونخوا کا مزید کہنا تھا کہ امن و امان حکومت کی پہلی ترجیح ہے اور اس پر کوئی سمجھوتہ نہیں کیا جائے گا۔