لاہور: وزیراعلیٰ پنجاب مریم نواز شریف کی زیر صدارت امن و امان پر مسلسل تیسرے غیر معمولی اجلاس میں ریاستی رِٹ اور قانون کی بالادستی یقینی بنانے کے لیے تاریخی فیصلے کیے گئے۔
اجلاس میں صوبے بھر میں انتہا پسندی، مافیا کلچر، ڈالا کلچر اور غیر قانونی غیر ملکیوں کے خلاف سخت کارروائیاں تیز کرنے کا فیصلہ کیا گیا۔
پنجاب حکومت کے بڑے فیصلے
• لاؤڈ اسپیکر ایکٹ کے نفاذ کو لازمی اور مزید سخت کرنے کا فیصلہ
• ہر ضلع میں وِسل بلور سیل قائم کیا جائے گا
• پنجاب پولیس ہیلپ لائن 15 پر انتہا پسند جماعتوں اور غیر قانونی غیر ملکیوں کے خلاف خصوصی سیل قائم
• عوام سے اپیل: ’’کسی بھی مشتبہ سرگرمی یا غیر قانونی رہائشی کی اطلاع فوراً 15 پر دیں‘‘
غیر قانونی اسلحہ اور انتہا پسندی کے خلاف کریک ڈاؤن
اجلاس میں فیصلہ کیا گیا کہ صوبے کو غیر قانونی اسلحہ سے پاک کرنے کے لیے کارروائیاں مزید سخت اور تیز کی جائیں گی۔
وزیراعلیٰ مریم نواز نے واضح کیا کہ پنجاب میں ڈالا کلچر، بدماشی اور مافیا کلچر کسی صورت برداشت نہیں کیا جائے گا۔
امن کمیٹیوں کو مؤثر اور فعال بنانے کا فیصلہ
پنجاب حکومت نے ہدایت دی کہ امن کمیٹیاں فوری طور پر مؤثر اور فعال کی جائیں، تمام آپریشنز میں امن کمیٹیوں کو آن بورڈ رکھا جائے گا۔
موبائل پولیس اسٹیشن سروس
وزیراعلیٰ پنجاب نے ہدایت دی کہ ’’ریاست عوام کی چوکھٹ پر‘‘ وژن کے تحت ہر شہری کے دروازے تک موبائل پولیس اسٹیشن کی خدمات پہنچائی جائیں۔
کومبنگ آپریشنز صرف مخصوص انتہا پسند عناصر کے خلاف
پنجاب حکومت نے واضح کیا کہ کومبنگ آپریشنز کسی فرقے یا عقیدے کے خلاف نہیں بلکہ صرف انتہا پسند ذہنیت کے حامل عناصر کے خلاف کیے جا رہے ہیں۔
نفرت انگیز مواد اور غیر قانونی اشتہارات پر پابندی
• انتہا پسند جتھوں کے اشتہارات، تصاویر اور پلے کارڈز پر سخت پابندی عائد
• سوشل میڈیا پر نفرت انگیز مواد پھیلانے والوں کے خلاف پیکا ایکٹ کے تحت مقدمات درج کیے جائیں گے
• پنجاب میں نفرت انگیزی اور شر انگیزی کے خلاف زیرو ٹالرنس پالیسی نافذ کر دی گئی
غیر قانونی غیر ملکیوں کے خلاف روزانہ رپورٹنگ
تمام ضلعی انتظامیہ کو ہدایت دی گئی کہ:
• روزانہ کی بنیاد پر غیر قانونی بین الاقوامی رہائشیوں کے خلاف کومبنگ آپریشنز کی رپورٹس اپ ڈیٹ کی جائیں
• یہ بتایا جائے کہ کتنے غیر قانونی افراد کاروبار سے منسلک ہیں
• کتنے کو ڈی پورٹیشن مراکز بھیجا گیا
• کتنے کو ٹیکس نیٹ میں شامل کیا گیا
عوام کے لیے انتباہ
پنجاب حکومت نے خبردار کیا ہے کہ اگر کوئی شہری غیر قانونی رہائشیوں کو دکان یا مکان کرائے پر دے گا تو اس کے خلاف کرایہ داری ایکٹ یا پاسپورٹ ایکٹ کے تحت سخت کارروائی ہوگی۔
مزید برآں، غیر قانونی اجتماعات یا بازار بند کرانے والے عناصر کے خلاف دہشت گردی قوانین کے تحت مقدمات درج کیے جائیں گے۔
وزیراعلیٰ مریم نواز نے اجلاس کے اختتام پر کہا کہ
“پنجاب کی زمین ریاست دشمنوں، انتہا پسندوں اور بدمعاشوں کے لیے تنگ کر دی گئی ہے۔ عوام کے تحفظ اور قانون کی بالادستی پر کوئی سمجھوتہ نہیں ہوگا۔