کراچی: متحدہ قومی موومنٹ (ایم کیو ایم) پاکستان کی رکنِ قومی اسمبلی ڈاکٹر نکہت شکیل آن لائن فراڈ کا نشانہ بن گئیں، نوسربازوں نے ان کا واٹس ایپ اکاؤنٹ ہیک کرکے ان کے رشتے داروں اور دوستوں سے رقم بٹور لی۔
ڈاکٹر نکہت شکیل کے مطابق، ایک شخص نے پاکستان میڈیکل اینڈ ڈینٹل کونسل (PMDC) کے نمائندے کے طور پر خود کو متعارف کرایا اور کہا کہ ادارے کی جانب سے ان کے لیے دستاویزات کا ایک پارسل بھیجا گیا ہے، جس کے لیے انہیں ایک کوڈ فراہم کرنے کی ضرورت ہے۔
انہوں نے بتایا کہ جیسے ہی انہوں نے وہ کوڈ شیئر کیا، ان کا واٹس ایپ اکاؤنٹ ہیک ہوگیا۔
نوسرباز نے واٹس ایپ سے پیسے منگوائے
ڈاکٹر نکہت شکیل نے بتایا کہ ہیکر نے ان کے واٹس ایپ نمبر سے اہم شخصیات، دوستوں اور رشتے داروں کو پیغامات بھیجے اور رقوم طلب کیں۔
’’جن لوگوں نے مجھ سے تصدیق کرلی، وہ بچ گئے، مگر کچھ نے اعتماد میں آکر پیسے بھیج دیے۔‘‘
فراڈ میں ادارے کے نام کا استعمال
ایم کیو ایم کی رکن قومی اسمبلی نے سوال اٹھایا کہ نوسرباز کو PMDC کی دستاویزات سے متعلق معلومات کہاں سے حاصل ہوئیں —
’’یہ بات خود ایک بڑا سوالیہ نشان ہے۔‘‘
شہریوں کے لیے انتباہ
ڈاکٹر نکہت شکیل نے شہریوں سے اپیل کی کہ وہ کسی بھی غیر متوقع فون کال یا واٹس ایپ کوڈ شیئر کرنے سے گریز کریں، کیونکہ اس طرح کے فراڈز میں اہم ذاتی اور مالی نقصان ہو سکتا ہے۔
پولیس اور سائبر کرائم ونگ نے واقعے کی تحقیقات شروع کر دی ہیں، جبکہ متاثرہ ایم این اے کی جانب سے باضابطہ شکایت درج کرانے کی تیاری کی جا رہی ہے