لاہور: وزیراعلیٰ پنجاب مریم نواز شریف کے گرین پنجاب ویژن کے تحت محکمہ جنگلات پنجاب کی جانب سے ٹمبر مافیا کے خلاف بھرپور کارروائیاں جاری ہیں۔ اسی سلسلے میں مری فاریسٹ ڈویژن میں ایک بڑی کارروائی کے دوران قیمتی لکڑی اسمگل کرنے کی کوشش ناکام بنا دی گئی۔
محکمہ جنگلات کے مطابق کارروائی 23 اور 24 اکتوبر کی درمیانی شب ہلواڑ کے علاقے میں کی گئی، جہاں فاریسٹ ٹیم نے ایک مشکوک گاڑی کو روک کر تلاشی لی۔ گاڑی سے بھاری مقدار میں قیمتی لکڑی برآمد ہوئی جسے تحویل میں لے کر فاریسٹ رینج آفس منتقل کر دیا گیا۔ تاہم ملزمان موقع سے فرار ہونے میں کامیاب ہو گئے، جن کی گرفتاری کے لیے چھاپے مارنے کا سلسلہ جاری ہے۔
درختوں کی غیر قانونی کٹائی کو سموگ اور فضائی آلودگی میں اضافے کا بڑا سبب قرار دیا گیا ہے، اسی تناظر میں حکومتِ پنجاب نے زیرو ٹالرنس پالیسی کے تحت کارروائیاں مزید تیز کر دی ہیں تاکہ ماحولیاتی توازن اور قدرتی وسائل کا تحفظ یقینی بنایا جا سکے۔
سینئر صوبائی وزیر مریم اورنگزیب نے کہا کہ:
“وزیراعلیٰ مریم نواز شریف کے ویژن کے مطابق گرین پنجاب مشن کے تحت جنگلات کے تحفظ اور شجرکاری مہم تیزی سے جاری ہے۔ ٹمبر مافیا کے خلاف کارروائیاں ماحولیاتی تحفظ اور سموگ کے خاتمے کے لیے حکومتی عزم کی عکاس ہیں۔”
انہوں نے مزید کہا کہ محکمہ جنگلات کی یہ کارروائیاں سموگ کنٹرول پروگرام کا اہم حصہ ہیں، جن کے ذریعے ماحول دوست پالیسیوں پر عمل درآمد یقینی بنایا جا رہا ہے۔ حکومتِ پنجاب قدرتی وسائل کے پائیدار استعمال اور آلودگی کے خاتمے کے لیے ایک جامع حکمتِ عملی پر عمل پیرا ہے۔