راولپنڈی: آزاد کشمیر میں ممکنہ ان ہاؤس تبدیلی کے معاملے پر مسلم لیگ (ن) کے اہم اجلاس کی تفصیلات سامنے آ گئی ہیں۔ ذرائع کے مطابق اجلاس میں جماعت کی اعلیٰ قیادت نے آزاد کشمیر کی سیاسی صورتِ حال پر مشاورت مکمل کر لی ہے۔
اجلاس میں وفاقی وزراء احسن اقبال، رانا ثناءاللہ اور وزیرِ امورِ کشمیر انجینئر امیر مقام سمیت مسلم لیگ (ن) آزاد کشمیر کے صدر شاہ غلام قادر، سابق وزیراعظم راجہ فاروق حیدر خان، اراکینِ پارلیمانی پارٹی اور مرکزی عہدیداران نے شرکت کی۔
ذرائع کے مطابق اجلاس میں فیصلہ کیا گیا کہ مسلم لیگ (ن) آزاد کشمیر میں حکومت کی تبدیلی کی حمایت تو کرے گی، تاہم نئی حکومت کا حصہ نہیں بنے گی۔
مزید یہ طے پایا کہ نئے وزیرِاعظم کے انتخاب میں مسلم لیگ (ن) پیپلز پارٹی کے امیدوار کو ووٹ نہیں دے گی۔ ذرائع نے بتایا کہ پارٹی قیادت نے واضح کیا کہ تحریکِ عدم اعتماد ایک الگ معاملہ ہے، جبکہ قائدِ ایوان کے انتخاب کا فیصلہ الگ طور پر کیا جائے گا۔
اجلاس میں یہ بھی طے کیا گیا کہ مسلم لیگ (ن) جلد پیپلز پارٹی سے آزاد کشمیر میں قبل از وقت انتخابات کے حوالے سے مشاورت کرے گی۔
ذرائع کے مطابق سیاسی رابطہ کمیٹی نے آزاد کشمیر کی پارلیمانی پارٹی کو پیپلز پارٹی سے طے پانے والے فارمولے پر اعتماد میں لیا، جبکہ آئندہ کی سیاسی حکمتِ عملی پر تفصیلی غور کیا گیا۔ کمیٹی نے آزاد کشمیر کی قیادت سے آئندہ لائحہ عمل کے بارے میں تجاویز طلب کر لی ہیں۔
ذرائع کا کہنا ہے کہ سیاسی رابطہ کمیٹی اجلاس کی تمام تفصیلات اور سفارشات پر مشتمل رپورٹ وزیراعظم شہباز شریف کو وطن واپسی پر پیش کرے گی۔