وزیراعلیٰ پنجاب مریم نواز سے امریکی قونصل جنرل سٹیٹسن سینڈرس کی ملاقات

لاہور: وزیراعلیٰ پنجاب مریم نواز شریف سے امریکی قونصل جنرل سٹیٹسن سینڈرس نے ملاقات کی، جس میں باہمی دلچسپی کے امور، سرمایہ کاری، تجارت، ثقافت اور سیاحت کے فروغ پر تبادلہ خیال کیا گیا۔

امریکی قونصل جنرل نے وزیراعلیٰ پنجاب مریم نواز شریف کی پرتپاک مہمان نوازی پر شکریہ ادا کیا اور پنجاب میں جاری ترقیاتی اقدامات، شفاف طرزِ حکمرانی اور سرمایہ کاری کے فروغ کے لیے کیے جانے والے اقدامات کو سراہا۔

ملاقات کے دوران امریکہ کے نئے پولیٹیکل اینڈ اکنامک آفیسر کا بھی تعارف کرایا گیا۔ وزیراعلیٰ مریم نواز شریف نے پاکستان اور امریکہ کے تعلقات میں پائی جانے والی گرمجوشی کو خوش آئند قرار دیتے ہوئے کہا کہ

“پاکستان اور امریکہ کے دو طرفہ تعلقات میں مسلسل بہتری آ رہی ہے، جو خوش آئند امر ہے۔ وزیراعظم محمد شہباز شریف کا حالیہ دورہ امریکہ ان تعلقات میں مزید استحکام کا باعث بنے گا۔”

وزیراعلیٰ نے کہا کہ پاکستان اور امریکہ کے موجودہ تعلقات افق کی نئی بلندیوں کو چھو رہے ہیں۔ انہوں نے امریکی سرمایہ کاروں کو پنجاب میں سرمایہ کاری کے وسیع مواقع سے فائدہ اٹھانے کی دعوت دی۔

مریم نواز شریف نے بتایا کہ پنجاب نے تاریخ کے بدترین سیلاب کا پامردی سے سامنا کیا اور ایک تاریخی ریسکیو و ریلیف آپریشن کے بعد بحالی کا کام تیزی سے جاری ہے۔ سیلاب متاثرین کے لیے حکومتِ پنجاب کے تاریخی پیکج پر عملدرآمد شروع ہو چکا ہے۔

انہوں نے مزید کہا کہ پنجاب میں کلچرل ٹورازم کے فروغ کے لیے قدیمی ثقافتی ورثے کی بحالی اور بہتری پر خصوصی توجہ دی جا رہی ہے۔

“پنجاب ثقافتی تنوع سے مالا مال سرزمین ہے جو عالمی سطح پر سیاحت کے حب بننے کا بھرپور پوٹینشل رکھتی ہے۔ سرزمین پنجاب ہزارہا سال پرانی تہذیب اور مذہبی ثقافت کی علمبردار ہے۔”

وزیراعلیٰ نے کہا کہ حکومتِ پنجاب کے ویمن ایمپاورمنٹ پراجیکٹس ثمر آور ثابت ہو رہے ہیں، جب کہ لاہور سمیت دیگر شہروں میں بروقت اقدامات اور ماحول دوست منصوبوں کی بدولت ایئر کوالٹی انڈیکس میں بہتری آ رہی ہے۔ حکومت پنجاب سرحد پار سے آنے والی سموگ کے اثرات کو کم سے کم سطح پر لانے کے لیے بھی کوشاں ہے۔

اس موقع پر امریکی قونصل جنرل سٹیٹسن سینڈرس نے کہا کہ

“وزیراعلیٰ پنجاب کا سرمایہ کاری اور تجارت کے فروغ کے لیے شروع کیا گیا ای بزنس پراجیکٹ قابلِ تحسین ہے۔ اس منصوبے سے سرمایہ کاروں کے لیے نمایاں آسانیاں پیدا ہو رہی ہیں۔ پنجاب میں جس رفتار اور معیار کے ساتھ ترقیاتی کام ہو رہے ہیں، وہ قابلِ محسوس ہیں۔”