پشاور: محکمہ انسداد دہشت گردی (سی ٹی ڈی) خیبرپختونخوا نے ایک ہزار 349 خطرناک اور انتہائی مطلوب دہشت گردوں کی فہرست محکمہ داخلہ کو ارسال کردی ہے۔
ذرائع کے مطابق یہ فہرست خیبرپختونخوا حکومت کی جانب سے وفاقی وزارت داخلہ کو بھجوائی گئی، جس کے بعد وزارت داخلہ نے تمام صوبوں کو فہرست ارسال کر دی ہے۔
فہرست میں شامل دہشت گردوں کا تعلق پشاور، ڈیرہ اسماعیل خان، سوات، باجوڑ، کرم اور دیگر حساس علاقوں سے بتایا گیا ہے۔
ذرائع کا کہنا ہے کہ فہرست میں شامل 1349 انتہائی مطلوب دہشت گردوں کے مکمل کوائف درج ہیں، جبکہ ان میں سے کئی کے سروں کی قیمتیں بھی مقرر کی گئی ہیں۔
فہرست کے مطابق:
• کرم کے کاظم خان کے سر کی قیمت 3 کروڑ روپے رکھی گئی ہے۔
• دہشت گرد کمانڈر امجد اللہ کے سر کی قیمت 2 کروڑ روپے مقرر کی گئی ہے۔
• باجوڑ کے مولوی فقیر محمد کے سر کی قیمت 1 کروڑ 50 لاکھ روپے مقرر ہے۔
ذرائع کے مطابق 59 انتہائی مطلوب دہشت گردوں کے سروں کی قیمت 1 سے 3 کروڑ روپے تک رکھی گئی ہے، جبکہ باقی دہشت گردوں کے بارے میں بھی انعامی رقم تجویز کی گئی ہے۔
محکمہ انسداد دہشت گردی کے مطابق یہ فہرست دہشت گردی کے خلاف جاری کارروائیوں میں مدد کے لیے تیار کی گئی ہے تاکہ مطلوب دہشت گردوں کی فوری گرفتاری ممکن ہو سکے۔
