لاہور: وزیراعلیٰ پنجاب مریم نواز سے ساہیوال ڈویژن کے ارکان قومی و صوبائی اسمبلی اور مسلم لیگ (ن) کے ٹکٹ ہولڈرز نے ملاقات کی۔ ملاقات میں عوامی فلاح و بہبود کے منصوبوں، امن و امان کی صورتحال، سڑکوں کی بحالی، ’’ستھرا پنجاب‘‘ پروگرام، صحت اور ٹرانسپورٹ کے شعبوں میں جاری اصلاحات پر تفصیلی بات چیت کی گئی۔
ساہیوال ڈویژن کے ارکان اسمبلی نے پنجاب بھر میں 20 ہزار کلومیٹر طویل سڑکوں کی بحالی کے منصوبے پر وزیراعلیٰ مریم نواز شریف کی کاوشوں کو سراہا۔ انہوں نے جدید کیتھ لیب کے قیام اور الیکٹرو بس سروس کے اجراء پر بھی وزیراعلیٰ کی عوام دوست قیادت کو خراجِ تحسین پیش کیا۔
وزیراعلیٰ مریم نواز شریف نے کہا کہ عوامی خدمت، تیز رفتار ترقی اور شفاف گورننس ہی مسلم لیگ (ن) کا اصل ایجنڈا ہے۔ انہوں نے کہا کہ پنجاب میں جرائم کی شرح میں نمایاں کمی آئی ہے اور شہروں و دیہات میں امن بحال ہو چکا ہے۔
ان کا کہنا تھا کہ اضلاع میں پبلک ٹرانسپورٹ کے منصوبے اور سڑکوں کی بحالی صرف انفراسٹرکچر کی بہتری نہیں بلکہ روزگار اور معاشی خوشحالی کے نئے مواقع پیدا کر رہے ہیں۔
وزیراعلیٰ نے مزید کہا کہ ’’ستھرا پنجاب‘‘ پروگرام محض صفائی مہم نہیں بلکہ ایک نئے کلچر کی بنیاد ہے جو صوبے میں شہری شعور اور ذمہ داری کو فروغ دے رہا ہے۔
ساہیوال ڈویژن کے ارکان اسمبلی نے کہا کہ وزیراعلیٰ مریم نواز شریف کی قیادت میں پنجاب آج ایک پرامن، صاف اور برق رفتاری سے ترقی کرتا ہوا صوبہ بن چکا ہے۔ انہوں نے کہا کہ کیتھ لیبز اور الیکٹرو بس سروس جیسے منصوبے مریم نواز شریف کی عوام دوست قیادت کی روشن مثال ہیں جن سے ہر طبقہ مستفید ہو رہا ہے۔
