سیالکوٹ: وزیرِ دفاع خواجہ آصف نے کہا ہے کہ اگر امت نے عالمِ اسلام کے خلاف ہونے والی زیادتیوں کے خلاف متحد ہو کر آواز نہ اٹھائی تو سب کی حالت غزہ اور مقبوضہ کشمیر جیسی ہو سکتی ہے۔
سیالکوٹ میں میڈیا سے گفتگو کرتے ہوئے خواجہ آصف نے کہا کہ آج شاعرِ مشرق علامہ اقبالؒ کی یومِ پیدائش ہے اور اقبال کا کلام ہمیشہ زندہ رہے گا، مگر بدقسمتی سے ہم اقبال کے پیغام کو بھولتے جا رہے ہیں۔ اُن کا مزید کہنا تھا کہ امتِ مسلمہ اس وقت بھٹکی ہوئی نظر آتی ہے اور غزہ سے لے کر کشمیر تک مظالم جاری ہیں۔
وزیرِ دفاع نے کہا: “اللہ تعالی ہمیں ہمت اور طاقت دے کہ ہم مظلوم بہن بھائیوں کی مدد کر سکیں، ان کے لیے آواز بلند کر سکیں اور لڑ سکیں۔ اگر ہم اپنی اپنی ریاستیں بچاتے رہے اور مل کر جدوجہد نہ کی تو ہم باری باری مشکلات کا شکار ہوں گے۔”
انہوں نے زور دیا کہ عالمِ اسلام کے خلاف لڑائی متحدہ انداز میں نہ لڑی گئی تو سب کی حالت غزہ اور مقبوضہ کشمیر کی مانند ہو جائے گی۔
خواجہ آصف کی یہ باتیں علامہ اقبال کے یومِ پیدائش کے موقع پر کی گئیں، جن میں انہوں نے اقبال کے شعری پیغام اور اتحادِ امت کی ضرورت پر زور دیا.
