اسلام آباد: شاعر مشرق اور مفکرِ پاکستان علامہ محمد اقبالؒ کے 148 ویں یومِ پیدائش پر صدرِ مملکت آصف علی زرداری اور وزیراعظم شہباز شریف نے عظیم فلسفی شاعر کو زبردست خراجِ عقیدت پیش کیا ہے۔
صدر مملکت آصف علی زرداری نے اپنے پیغام میں کہا کہ علامہ اقبالؒ نے برصغیر کے مسلمانوں میں آزادی کا شعور اور خودی کا پیغام بیدار کیا۔ انہوں نے کہا کہ اقبالؒ کا 1930 کا خطبۂ الہ آباد مسلمانوں کی سیاسی خودمختاری کی بنیاد ثابت ہوا۔
صدر نے مزید کہا کہ اقبالؒ کے نظریات اور فکر نے پاکستان کی قومی شناخت کی تشکیل میں بنیادی کردار ادا کیا اور ان کا فکری ورثہ آج بھی آنے والی نسلوں کے لیے روشن راستہ ہے۔
صدر آصف علی زرداری کے مطابق “پاکستان کو خوشحال، پُرامن اور متحد بنانے کے لیے ہمیں اقبالؒ کے اصولوں اور تعلیمات پر عمل کرنا ہوگا۔”
وزیراعظم شہباز شریف کا خراجِ عقیدت
وزیراعظم شہباز شریف نے اپنے پیغام میں کہا کہ علامہ اقبالؒ نے غلامی کے اندھیروں میں امید اور خودی کی شمع روشن کی اور قوم کو ایمان، علم اور عمل کی بنیاد پر اپنی تقدیر خود بنانے کا درس دیا۔
وزیراعظم نے کہا کہ “اقبالؒ کا نوجوان ملت کا معمار اور مستقبل کا شاہین ہے۔”
انہوں نے مزید کہا کہ حکومت نوجوانوں کی ترقی کے لیے “اُڑان پاکستان” سمیت مختلف پروگرام اسی فکر کے تحت شروع کر چکی ہے۔
شہباز شریف کا کہنا تھا کہ اقبالؒ عالم اسلام کے اتحاد اور دنیا میں امن کے خواہاں تھے اور آج بھی ان کی فکر قومی اور عالمی حالات میں رہنمائی فراہم کرتی ہے۔