اسلام آباد: مسلمانوں کے لیے آزاد ریاست کا خواب دیکھنے والے اور قوم میں خودی کی روح بیدار کرنے والے مفکرِ پاکستان، شاعرِ مشرق ڈاکٹر علامہ محمد اقبالؒ کا 148 واں یومِ پیدائش آج ملک بھر میں عقیدت و احترام کے ساتھ منایا جا رہا ہے۔
لاہور میں مزارِ اقبال پر گارڈز کی تبدیلی کی پُروقار تقریب منعقد ہوگی، جس میں پاک رینجرز اور پاک آرمی کے جوان اعزاز کی ڈیوٹی سنبھالیں گے۔
ہر سال 9 نومبر کو علامہ اقبالؒ کے پیدائش کے دن کو یومِ اقبال کے طور پر منایا جاتا ہے۔ اس موقع پر تقریبات، سیمینارز اور مشاعروں کا انعقاد کیا جاتا ہے تاکہ ان کے افکار اور فلسفے کو نئی نسل تک منتقل کیا جا سکے۔
علامہ اقبالؒ نے اپنی شاعری اور فکر سے برصغیر کے مسلمانوں میں آزادی، خودی اور جداگانہ قومیت کا شعور بیدار کیا۔ ان کے الفاظ نے ایک محکوم قوم میں امید اور جدوجہد کا حوصلہ پیدا کیا، جس نے بعد ازاں پاکستان کی صورت میں آزاد وطن کی بنیاد رکھی۔
اقبالؒ نے بتایا کہ اگر مسلمان علم، ایمان اور عمل کو اپنا شعار بنا لیں تو وہ دنیا میں عزت و وقار سے زندہ رہ سکتے ہیں۔ ان کی تعلیمات آج بھی رہنمائی کا سرچشمہ سمجھی جاتی ہیں۔
مفکرِ پاکستان علامہ محمد اقبالؒ 9 نومبر 1877 کو سیالکوٹ میں پیدا ہوئے اور 21 اپریل 1938 کو لاہور میں وفات پائی۔ ان کا مزار بادشاہی مسجد کے پہلو میں واقع ہے جہاں آج ہزاروں زائرین حاضری دیں گے۔
