اسلام آباد: وزیرِ اعظم محمد شہباز شریف کی جانب سے حکومتی اور اتحادی جماعتوں کے سینیٹرز کے اعزاز میں خصوصی عشائیہ دیا گیا جس میں 27ویں آئینی ترمیم کی منظوری سے متعلق پارلیمانی پیش رفت پر اظہارِ تشکر کیا گیا۔
وزیرِ اعظم نے اپنے خطاب میں کہا کہ صدر مملکت آصف علی زرداری اور تمام اتحادی جماعتوں کے قائدین کے مشکور ہیں جنہوں نے قومی مفاد میں متفقہ حکمتِ عملی اختیار کی۔ انہوں نے کہا کہ وفاق کی مضبوطی، صوبوں کے درمیان ہم آہنگی اور گورننس کے مؤثر نظام کے لیے 27ویں آئینی ترمیم ایک اہم سنگِ میل ہے۔
وزیرِ اعظم نے کہا:
“اس ترمیم کی منظوری حکومت اور اتحادی جماعتوں کے باہمی اعتماد اور تعاون کا نتیجہ ہے۔ ہم نے ہمیشہ ملک کے وسیع تر مفاد کو مقدم رکھا۔”
وزیرِ اعظم نے مزید کہا کہ حکومت کی سفارتی کامیابیاں اور عالمی سطح پر پاکستان کا مثبت تاثر اتحادی جماعتوں کے اتحاد اور ہم آہنگی کی عکاسی کرتا ہے۔ انہوں نے کہا کہ مشترکہ کوششوں کی بدولت ملک کی سیاسی اور معاشی صورتحال میں بہتری آرہی ہے۔
انہوں نے کہا:
“اللہ کے فضل و کرم سے پاکستان کی سمت درست ہو چکی ہے۔ معاشی استحکام پیدا ہورہا ہے اور ہمیں ملک کی ترقی و خوشحالی کے لیے ساتھ مل کر کام جاری رکھنا ہے۔”
عشائیے میں اتحادی جماعتوں کے سینیٹرز کی بڑی تعداد نے شرکت کی۔