اسلام آباد: قومی اسمبلی کے اجلاس میں وزیر قانون سینیٹر اعظم نذیر تارڑ نے 27ویں آئینی ترمیم کا بل پیش کردیا، جس دوران اپوزیشن کی جانب سے شدید شور شرابہ اور احتجاج جاری رہا۔
اسپیکر سردار ایاز صادق کی زیر صدارت اجلاس میں وزیر قانون نے بتایا کہ بل پہلے ہی سینیٹ سے دو تہائی اکثریت سے منظور ہو چکا ہے۔ انہوں نے کہا کہ مشترکہ پارلیمانی کمیٹی میں اپوزیشن کو شرکت کرنی چاہیے تھی تاکہ ترامیم پر مشاورت ممکن ہوتی۔
اعظم نذیر تارڑ کا کہنا تھا کہ دنیا بھر میں آئینی معاملات کے لیے آئینی عدالتیں قائم ہوتی ہیں اور ججز کی تقرری کا طریقہ کار جوڈیشل کمیشن کے ذریعے ہوتا ہے۔ انہوں نے کہا کہ بل میں سوموٹو اختیار کی خودکار نوعیت ختم کرتے ہوئے ایک واضح طریقہ کار تجویز کیا گیا ہے۔
انہوں نے کہا کہ ماضی میں سوموٹو کے بے جا استعمال سے ملک کے اہم اقدامات متاثر ہوئے۔ ’’کیا منتخب وزیراعظم کو گھر بھیجنے سے بات شروع کی جائے؟ اداکاروں کے کیسز سے لے کر کسٹمز تک ہر معاملے میں سوموٹو لیا گیا،‘‘ وزیر قانون کا کہنا تھا۔
بل کے مطابق ججز کے تبادلوں کا اختیار جوڈیشل کمیشن کو دیا جائے گا اور اگر کوئی جج تبادلہ ماننے سے انکار کرے تو اسے ریٹائر تصور کیا جائے گا۔ کمیشن میں سپریم کورٹ اور آئینی عدالت کے 5 ججز کے ساتھ حکومت اور اپوزیشن کے دو دو اراکین شامل ہوں گے۔
وزیر قانون کے مطابق ترمیم کے بعد سپریم کورٹ عوامی اور دیوانی نوعیت کے مقدمات سنے گی جبکہ آئینی مقدمات کے لیے الگ آئینی عدالت قائم کی جائے گی۔ انہوں نے کہا کہ ترمیم منظور ہونے کی صورت میں موجودہ چیف جسٹس ہی آئینی کمیشن اور اداروں کی سربراہی کریں گے۔
اعظم نذیر تارڑ نے فیلڈ مارشل کے عہدے سے متعلق بھی وضاحت کرتے ہوئے کہا کہ یہ ایک اعزازی رینک ہے جو تاحیات برقرار رہتا ہے اور دنیا کے کئی ممالک میں رائج ہے۔ انہوں نے کہا کہ اس رینک کو آئینی حدود میں لانے کی ضرورت تھی۔
انہوں نے مزید کہا کہ صدرِ مملکت کے لیے استثنیٰ برقرار رہے گا تاہم اگر وہ دوبارہ کسی عوامی عہدے پر فائز ہوتے ہیں تو یہ استثنیٰ ختم ہو جائے گا۔
واضح رہے کہ گزشتہ روز سینیٹ میں 27 ویں آئینی ترمیم کا بل دو تہائی اکثریت سے منظور کیا گیا تھا، جس میں بل کی حمایت میں 64 ووٹ پڑے جبکہ مخالفت میں کوئی ووٹ نہیں آیا تھا۔