اسلام آباد: وفاقی وزیر داخلہ و چیئرمین پی سی بی محسن نقوی سے سری لنکا کے ہائی کمشنر رئیر ایڈمرل (ر) فریڈ سری ویراتنے نے ملاقات کی۔ ملاقات میں سری لنکا اور پاکستان کرکٹ ٹیموں کے مینجرز، پی سی بی کے چیف آپریٹنگ آفیسر سمیر احمد، چیف کمشنر اسلام آباد اور آئی جی اسلام آباد پولیس بھی موجود تھے۔
ملاقات کے دوران چیف کمشنر اور آئی جی اسلام آباد پولیس نے سری لنکن ٹیم کو فراہم کردہ سیکیورٹی انتظامات پر تفصیلی بریفنگ دی۔ اس موقع پر سری لنکن ہائی کمشنر نے سیکیورٹی انتظامات پر اطمینان کا اظہار کرتے ہوئے کہا کہ پاکستان نے مہمان ٹیم کی حفاظت کے لیے قابلِ تعریف اقدامات کیے ہیں۔
دہشت گرد حملے پر اظہارِ افسوس اور یکجہتی
ملاقات کے دوران سری لنکا کے ہائی کمشنر نے اسلام آباد میں حالیہ دہشت گرد حملے میں قیمتی جانوں کے ضیاع پر گہرے دکھ اور افسوس کا اظہار کیا۔ انہوں نے متاثرہ خاندانوں سے دلی ہمدردی اور حکومتِ پاکستان سے مکمل یکجہتی کا اظہار کیا۔
محسن نقوی: مہمان کھلاڑیوں کی حفاظت ہماری اولین ترجیح ہے
وفاقی وزیر داخلہ و چیئرمین پی سی بی محسن نقوی نے اس موقع پر کہا کہ:
“سری لنکن کرکٹ ٹیم کے کھلاڑی ہمارے اسٹیٹ گیسٹ ہیں۔ ان کی فول پروف سیکیورٹی کے لیے تمام ضروری اقدامات یقینی بنائے گئے ہیں۔ مہمان کھلاڑیوں کو محفوظ اور پُرامن ماحول فراہم کرنا حکومت کی اولین ترجیح ہے۔”
سری لنکن ہائی کمشنر نے پاکستان حکومت اور اداروں کی جانب سے کیے گئے انتظامات کو انتہائی اطمینان بخش قرار دیتے ہوئے پاکستانی قوم کا شکریہ ادا کیا۔