27ویں آئینی ترمیم میں کوئی تکنیکی غلطی نہیں، قومی اسمبلی کی تجاویز پر بات ہو رہی ہے: اعظم نذیر تارڑ

اسلام آباد: وفاقی وزیر قانون اعظم نذیر تارڑ نے کہا ہے کہ 27ویں آئینی ترمیم میں کوئی تکنیکی غلطی نہیں ہے اور قومی اسمبلی کی جانب سے دی گئی چند تجاویز پر غور کیا جا رہا ہے۔

پارلیمنٹ ہاؤس میں صحافیوں سے گفتگو کرتے ہوئے اعظم نذیر تارڑ نے کہا کہ

“قومی اسمبلی کے ایوان نے دو تین اچھی تجاویز دی ہیں جن پر بات چیت جاری ہے۔ تاہم 27ویں آئینی ترمیم میں کوئی تکنیکی غلطی نہیں پائی گئی۔”

انہوں نے مزید کہا کہ اگر قومی اسمبلی میں کسی قسم کی نئی ترمیم منظور کی گئی تو اس کی سینیٹ سے بھی منظوری لی جائے گی۔

آج 27ویں آئینی ترمیم منظور ہونے کا امکان

واضح رہے کہ قومی اسمبلی کا اجلاس جاری ہے، جہاں آج 27ویں آئینی ترمیم ترامیم کے ساتھ منظور ہونے کا امکان ہے۔
ترمیم کی منظوری کے بعد وفاقی آئینی عدالت کے قیام کی راہ ہموار ہو جائے گی۔

اپوزیشن کا اجلاس کے دوران احتجاج

دوسری جانب متحدہ اپوزیشن نے آج کے اجلاس کے دوران 27ویں آئینی ترمیم کے خلاف شدید احتجاج کیا اور ترمیم کو یکسر مسترد کر دیا۔