اسلام آباد: اسلام آباد جوڈیشل کمپلیکس خودکش دھماکا کیس کی تحقیقات میں اہم پیشرفت سامنے آگئی ہے۔ پولیس نے حملہ آور کو جوڈیشل کمپلیکس تک لانے والے موٹرسائیکل رائیڈر کو گرفتار کرلیا۔
ذرائع کے مطابق تفتیش میں یہ انکشاف ہوا ہے کہ خودکش حملہ آور کو ایک آن لائن موٹرسائیکل رائیڈر نے محض 200 روپے کرایہ میں جوڈیشل کمپلیکس (جی الیون کچہری) تک پہنچایا۔
پولیس ذرائع کا کہنا ہے کہ حملہ آور جوڈیشل کمپلیکس تک کیسے پہنچا، اس حوالے سے سیف سٹی کیمروں کی مدد سے تفتیش جاری تھی، جس میں اب اہم سراغ ملا ہے۔
مزید بتایا گیا ہے کہ پولیس حملہ آور کے گولڑہ تک پہنچنے کے راستوں اور اس کے ممکنہ سہولت کاروں کی تلاش میں بھی مصروف ہے۔
اس سے قبل تحقیقاتی اداروں کی ابتدائی رپورٹ میں کہا گیا تھا کہ خودکش حملہ آور جمعے کے روز اسلام آباد پہنچا اور پیرودھائی سے موٹرسائیکل پر سوار ہو کر جی الیون کچہری پہنچا۔
یاد رہے کہ گزشتہ روز اسلام آباد کے جی الیون سیکٹر میں جوڈیشل کمپلیکس کے قریب خودکش دھماکے کے نتیجے میں 12 افراد شہید اور متعدد زخمی ہوئے تھے۔
پولیس کے مطابق حملہ آور موٹرسائیکل پر سوار ہو کر پولیس کی گاڑی کے قریب پہنچا اور خود کو دھماکے سے اڑا لیا۔ دھماکے سے قریب کھڑی گاڑیوں میں آگ بھڑک اٹھی، جبکہ حملہ آور کے اعضا کچہری کے اندر تک جا گرے۔
تحقیقاتی ادارے سیف سٹی کیمروں، موبائل ڈیٹا اور جیو فینسنگ کی مدد سے واقعے میں ملوث عناصر کا سراغ لگانے میں مصروف ہیں۔