اسلام آباد: قومی مالیاتی کمیشن (این ایف سی) کا 18 نومبر کو طے شدہ مشاورتی اجلاس ملتوی کر دیا گیا ہے۔
وزارتِ خزانہ کے ذرائع کے مطابق، اجلاس کی ملتوی کیے جانے کی اطلاع چاروں صوبوں کو دے دی گئی ہے، تاہم اجلاس نہ بلانے کی کوئی باضابطہ وجہ بیان نہیں کی گئی۔
وزیراعظم ہاؤس سے منظوری نہ مل سکی
ذرائع کے مطابق وفاقی وزارتِ خزانہ نے صوبوں سے مشاورت کے بعد 18 نومبر کو اجلاس بلانے کے لیے وزیراعظم ہاؤس سے منظوری طلب کی تھی، تاہم وزیراعظم ہاؤس سے جواب موصول نہ ہونے پر صوبوں کو اجلاس ملتوی کیے جانے سے آگاہ کر دیا گیا۔
27ویں آئینی ترمیم سے متعلق پس منظر
ذرائع کے مطابق 27ویں آئینی ترمیم کے دوران این ایف سی سے متعلق ایک اہم تجویز پیش کی گئی تھی، جس میں صوبوں کو مالیاتی وسائل سے حصہ کم نہ کرنے کے تحفظ کو ختم کرنے کی بات شامل تھی۔
تاہم پیپلز پارٹی کی مخالفت کے بعد یہ شق ترمیمی بل سے خارج کر دی گئی۔
ماضی میں بھی اجلاس ملتوی
واضح رہے کہ این ایف سی اجلاس کے لیے اس سے قبل 29 اگست اور 10 نومبر کی تاریخیں بھی تجویز کی گئی تھیں۔
اگست میں طے شدہ اجلاس شدید بارشوں کے باعث ملتوی کر دیا گیا تھا۔
