اسلام آباد: وفاقی آئینی عدالت کے تین ججز نے اپنے عہدوں کا حلف اٹھا لیا ہے، جس کے ساتھ ہی آئینی عدالت باضابطہ طور پر فعال ہوگئی ہے۔
پہلے مرحلے میں جن ججز نے حلف اٹھایا اُن میں جسٹس حسن اظہر رضوی، جسٹس علی باقر نجفی اور جسٹس عامر فاروق شامل ہیں۔ تقریب حلف برداری وفاقی آئینی عدالت کے پہلے چیف جسٹس امین الدین خان نے لی۔
تقریب میں اسلام آباد ہائی کورٹ کے چیف جسٹس سرفراز ڈوگر سمیت دیگر معزز ججز اور سرکاری حکام بھی موجود تھے۔
اس سے قبل وزارتِ قانون کی جانب سے آئینی عدالت کے ججز کی تقرری کا باضابطہ نوٹیفکیشن جاری کیا گیا تھا، جس میں بتایا گیا تھا کہ وفاقی آئینی عدالت میں مجموعی طور پر 6 ججز تعینات ہوں گے۔
نوٹیفکیشن کے مطابق آئینی عدالت کے ججز کی فہرست:
• جسٹس حسن اظہر رضوی
• جسٹس عامر فاروق
• جسٹس علی باقر نجفی
• جسٹس کے کے آغا (سندھ ہائیکورٹ)
• جسٹس روزی خان (بلوچستان ہائیکورٹ)
• جسٹس ارشد حسین شاہ (پشاور ہائیکورٹ)
یاد رہے کہ 27ویں آئینی ترمیم کے بعد نئے عدالتی ڈھانچے پر تحفظات کا اظہار کرتے ہوئے سپریم کورٹ کے جسٹس منصور علی شاہ اور جسٹس اطہر من اللہ نے گزشتہ روز اپنے عہدوں سے استعفیٰ دے دیا تھا، جس کے بعد یہ معاملہ مزید اہمیت اختیار کر گیا ہے۔
وفاقی آئینی عدالت کا قیام موجودہ عدالتی نظام میں ایک بڑی تبدیلی تصور کیا جا رہا ہے، جبکہ قانونی اور سیاسی حلقوں کی جانب سے اس کے کردار اور اختیارات کے حوالے سے بحث جاری ہے۔
