اسلام آباد: جسٹس امین الدین خان نے وفاقی آئینی عدالت کے پہلے چیف جسٹس کی حیثیت سے اپنے عہدے کا حلف اٹھا لیا۔ حلف برداری کی یہ تاریخی تقریب ایوانِ صدر میں منعقد ہوئی، جہاں صدرِ پاکستان آصف علی زرداری نے اُن سے حلف لیا۔
تقریب میں وزیراعظم شہباز شریف، چیف جسٹس سپریم کورٹ جسٹس یحییٰ آفریدی، وفاقی وزراء، فیلڈ مارشل عاصم منیر، پاک بحریہ اور پاک فضائیہ کے سربراہان نے بھی شرکت کی۔ اس کے علاوہ اسپیکر قومی اسمبلی سردار ایاز صادق، چیئرمین سینیٹ یوسف رضا گیلانی اور اٹارنی جنرل منصور عثمان اعوان بھی تقریب میں موجود تھے۔
آئینی عدالت کے پہلے چیف جسٹس
جسٹس امین الدین خان پاکستان کی پہلی وفاقی آئینی عدالت کے چیف جسٹس مقرر کیے گئے ہیں۔ یہ عدالت مستقبل میں تمام آئینی نوعیت کے مقدمات کی سماعت کرے گی، جو ملکی عدالتی ڈھانچے میں ایک بڑی تبدیلی تصور کی جا رہی ہے۔
گزشتہ روز وزیراعظم شہباز شریف کی سفارش پر صدرِ مملکت نے جسٹس امین الدین خان کی بطور چیف جسٹس آئینی عدالت تقرری کی منظوری دی تھی۔
جسٹس امین الدین خان—پروفائل اور کیریئر پر ایک نظر
• 1984: یونیورسٹی لا کالج ملتان سے ایل ایل بی کیا
• 1985: باقاعدہ پریکٹس کا آغاز
• 1987: لاہور ہائیکورٹ میں وکالت کا لائسنس حاصل کیا
• 2001: سپریم کورٹ کے وکیل بنے
• لاہور ہائیکورٹ کے جج کی حیثیت سے مختلف جامعات کے سینڈیکیٹ کے رکن رہے
• بہاولپور، ملتان اور لاہور بینچ میں ہزاروں دیوانی مقدمات کے فیصلے کیے
• 21 اکتوبر 2019: سپریم کورٹ کے جج تعینات ہوئے
• سپریم کورٹ میں آئینی بینچ کے پہلے سربراہ بھی رہے
آئینی عدالت کے ججز کی حلف برداری آج اسلام آباد ہائیکورٹ میں ہوگی
ذرائع کے مطابق آئینی عدالت کے 6 ججز آج اسلام آباد ہائی کورٹ کے اوپن ایریا میں حلف اٹھائیں گے۔ اس سلسلے میں عدالت کے ججز بلاک اور ایڈمن بلاک کے درمیان خصوصی انتظامات کیے گئے ہیں۔
وفاقی آئینی عدالت کے سربراہ جسٹس امین الدین دیگر تمام ججز سے حلف لیں گے، جب کہ اس سے قبل وہ ایوان صدر میں اپنے عہدے کا حلف اٹھا چکے ہیں۔ حلف برداری کی تقریب کا ممکنہ وقت صبح 11 بجے مقرر کیا گیا ہے۔
ذرائع کے مطابق صدر آصف علی زرداری اس تقریب میں بھی شریک ہوں گے، جب کہ وزیراعظم شہباز شریف اور کابینہ کے اراکین بھی موجود ہوں گے۔