وزیراعلیٰ پنجاب مریم نواز شریف نے ورلڈ چِلڈرن ڈے کے موقع پر اپنے جذباتی اور شفقت بھرے پیغام میں کہا ہے کہ “میرے پاکستان کا ہر بچہ لختِ جگر ہے۔ اپنی اولاد کی طرح ان کا مستقبل، ان کی خوشی اور ان کا تحفظ میری اولین ترجیح ہے۔” انہوں نے پنجاب کے تمام بچوں کے لیے محبت، دعاؤں اور رحمتوں سے بھرپور سلام بھی پیش کیا۔
وزیراعلیٰ نے کہا کہ جہاں بچے محفوظ ہوں وہاں مستقبل روشن ہوتا ہے، اور پنجاب حکومت کا ہر قدم بچوں کی بھلائی، حفاظت، صحت اور تعلیم کے لیے وقف ہے۔ انہوں نے بتایا کہ بچوں کی صحت اور اعلیٰ تعلیم حکومت کی سب سے بڑی ترجیح ہے، اور اسی مقصد کے تحت متعدد فلاحی پروگرام کامیابی سے جاری ہیں۔
مریم نواز شریف نے کہا کہ چائلڈرن ہارٹ سرجری پروگرام کے ذریعے ہزاروں معصوم زندگیاں بچائی گئیں جبکہ ٹائپ ون شوگر کے مریض بچوں کو انسولین کٹس گھر گھر پہنچائی جا رہی ہیں۔ انہوں نے اعلان کیا کہ آٹسٹک بچوں کے لیے پاکستان کا پہلا سرکاری آٹزم اسکول قائم ہو چکا ہے جس کا افتتاح جلد کیا جائے گا۔
وزیراعلیٰ نے مزید کہا کہ ننھے بچوں کے لیے نواز شریف انسٹیٹیوٹ آف ارلی ایجوکیشن ہر ضلع میں قائم کیا جائے گا جبکہ ورچوئل سینٹر فار چائلڈ سیفٹی جدید نظام کے ذریعے بچوں کی گمشدگی، استحصال اور خطرات کے کیسز فوری حل کر رہا ہے۔
چائلڈ لیبر کے خاتمے کے لیے سخت کریک ڈاؤن جاری ہے اور بچوں کے خلاف تشدد و جرائم کے خاتمے کو یقینی بنایا جا رہا ہے۔ وزیراعلیٰ نے کہا کہ پنجاب میں بچوں کے جامع تحفظ کے لیے تمام ممکنہ اقدامات کیے گئے ہیں۔
جنوبی پنجاب میں غذائی قلت کے شکار بچوں کے لیے ’’سکول مِیل پروگرام‘‘ شروع کیا گیا ہے تاکہ بھوک تعلیم کی راہ میں رکاوٹ نہ بنے۔ سرکاری اسکولوں کے بچوں کو تمام ضروری سہولیات فراہم کی جا رہی ہیں، جب کہ خصوصی بچوں کو مصنوعی اعضا، ہیرنگ ایڈز اور وہیل چیئرز بھی دی جا رہی ہیں۔
وزیراعلیٰ مریم نواز شریف نے کہا: “کوئی بچہ محروم یا لاچار دکھائی دے تو مجھے نیند نہیں آتی۔ جب تک ہر بچے کی آنکھ میں خوبصورت مستقبل کی چمک نہیں آتی، میری جدوجہد جاری رہے گی۔”
انہوں نے اپنے پیغام کے اختتام پر کہا کہ پنجاب کا ہر بچہ پڑھے گا، صحت مند ہوگا، مسکرائے گا— “ماں اپنے بچوں کو کبھی تنہا نہیں چھوڑتی۔