لاہور: امیر جماعت اسلامی حافظ نعیم الرحمان نے کہا ہے کہ قومی انتخابات کے شیڈول کے اعلان تک جماعت اسلامی کسی امیدوار کو نامزد نہیں کرے گی۔ وہ لاہور میں مینارِ پاکستان پر جماعت اسلامی کے زیراہتمام ’’بدل دو نظام‘‘ کے عنوان سے ہونے والے اجتماعِ عام کے آخری روز خطاب کر رہے تھے۔
حافظ نعیم الرحمان نے کہا کہ پاکستان کی سیاسی جماعتوں میں نظم و ضبط کا شدید بحران ہے، جبکہ جماعت اسلامی میں ہر فیصلہ اور ہر قدم تنظیمی نظام کے تحت اٹھایا جاتا ہے۔ ان کا کہنا تھا کہ جماعت اسلامی کا مقصد پوری قوم کو ساتھ لے کر چلنا ہے، نہ کہ صوبوں کو آپس میں لڑوانا۔
امریکا کی پالیسیوں پر تنقید
اپنے خطاب میں انہوں نے امریکا کے ساتھ حکومتی رویے کو بھی شدید تنقید کا نشانہ بنایا۔ ان کا کہنا تھا کہ امریکی صدر ڈونلڈ ٹرمپ کی خوشنودی کے لیے جو اقدامات کیے جا رہے ہیں وہ انتہائی غلط ہیں۔
انہوں نے کہا کہ امریکا کی غلامی اختیار کرکے ملک کو بہت نقصان پہنچایا گیا، حکمرانوں کو چاہیئے کہ وہ فلسطین کی کھل کر حمایت کریں اور اس معاملے پر پوری قوم کو متحد کریں۔
جماعت اسلامی کی آئندہ سیاسی حکمت عملی
امیر جماعت اسلامی نے اعلان کیا کہ قومی انتخابات کے شیڈول کا اعلان ہونے تک جماعت اسلامی کا کوئی امیدوار میدان میں نہیں آئے گا۔
ان کا کہنا تھا کہ جماعت اسلامی کا مقصد عوامی اتحاد ہے اور پارٹی ملک بھر کو ایک پلیٹ فارم پر لانے کے لیے جدوجہد جاری رکھے گی۔
اجتماع کے اختتام پر جماعت اسلامی کی مرکزی قیادت نے بھی ملک میں منصفانہ انتخابات اور بہتر حکمرانی کے مطالبات دہرائے.
