اسلام آباد: قومی لیبر فورس سروے 2024-25 کے نتائج جاری کر دیے گئے ہیں، جن کے مطابق پاکستان میں بیروزگاری کی شرح 7.1 فیصد ہو گئی ہے۔ سال 2020-21 میں بیروزگاری کی شرح 6.3 فیصد تھی، یعنی گزشتہ پانچ سال میں 0.8 فیصد اضافہ ہوا ہے۔ موجودہ طور پر پاکستان میں تقریباً 59 لاکھ افراد بے روزگار ہیں۔
سروے کے مطابق 2023 کی مردم شماری کے مطابق ملک کی کل آبادی 24 کروڑ 14 لاکھ 90 ہزار ہے، جن میں سے 3.3 فیصد افراد بے روزگار ہیں۔
روزگار کے شعبوں میں سروسز سیکٹر سب سے آگے ہے، جہاں 3 کروڑ 18 لاکھ 30 ہزار افراد برسر روزگار ہیں اور روزگار کی شرح 41.7 فیصد ہے۔ زرعی شعبے میں روزگار کی شرح 33.1 فیصد ہے، جہاں 2 کروڑ 55 لاکھ 30 ہزار افراد کام کر رہے ہیں۔ صنعتی شعبے میں روزگار کی شرح 25.7 فیصد ہے اور ایک کروڑ 98 لاکھ 60 ہزار افراد اس میں کام کر رہے ہیں۔
سروے کے مطابق پاکستان میں فی کس ماہانہ اوسط اجرت 39,042 روپے ہے، جو گزشتہ پانچ سال میں 15,014 روپے کے اضافے کے بعد ریکارڈ کی گئی ہے۔ مرد حضرات کی اوسط اجرت 39,302 روپے جبکہ خواتین کی 37,347 روپے ہے۔
