اسلام آباد: ڈسٹرکٹ اینڈ سیشن کورٹ نے 9 مئی سمیت متعدد مقدمات میں بانی پی ٹی آئی عمران خان اور ان کی اہلیہ بشریٰ بی بی کی ضمانت قبل از گرفتاری میں 23 دسمبر تک توسیع کر دی۔
ایڈیشنل ڈسٹرکٹ اینڈ سیشن جج محمد افضل مجوکہ نے عمران خان کے خلاف 9 مئی اور دیگر 5 کیسز کی سماعت کی۔ دورانِ سماعت عمران خان کی عدم پیشی کے باعث ضمانت کی درخواستوں پر دلائل نہیں ہو سکے، جس پر عدالت نے آئندہ سماعت میں انہیں عدالت میں یا ویڈیو لنک کے ذریعے پیش کرنے کی ہدایت کی۔
عدالت نے سماعت کے بعد عمران خان اور بشریٰ بی بی دونوں کو 23 دسمبر تک گرفتار کرنے سے روک دیا اور ضمانت میں توسیع دیتے ہوئے کیس کی سماعت بھی اسی تاریخ تک ملتوی کر دی۔
واضح رہے کہ عمران خان کے خلاف 9 مئی واقعات، اقدامِ قتل اور جعلی رسیدوں سمیت مختلف مقدمات درج ہیں، جب کہ بشریٰ بی بی پر مبینہ طور پر جعلی رسیدیں جمع کرانے کا الزام ہے۔
