لاہور: وزیراعلیٰ پنجاب مریم نواز شریف کی قیادت میں صوبے میں ٹریفک مینجمنٹ کے تاریخی اور بڑے اصلاحی اقدامات کا آغاز ہوگیا ہے، 60 سالہ پرانے ٹریفک ایکٹ میں 20 اہم ترامیم متعارف کرادی گئیں جن کا مقصد شہریوں کو محفوظ، منظم اور آسان سفر فراہم کرنا ہے۔
اجلاس میں ٹریفک کے جدید نظام، روڈ سیفٹی اور نظم و نسق سے متعلق جامع بریفنگ دی گئی، جبکہ ہیلمٹ، چھتوں پر سواریاں بٹھانے اور دیگر خلاف ورزیوں پر چالان سے متعلق رپورٹ بھی پیش کی گئی۔
اہم فیصلے اور اصلاحات
• پنجاب میں کسی بھی گاڑی کے بار بار چالان پر اس گاڑی کو نیلام کرنے کا فیصلہ
• سرکاری گاڑیوں کے لیے بھی سخت ضابطہ؛ خلاف ورزی پر بھاری جرمانہ ہوگا
• صوبے میں ون وے خلاف ورزی ختم کرنے کے لیے 30 روز کی مہلت
• یو ٹرن کی ری ماڈلنگ کے ذریعے سڑکوں کو محفوظ اور بہتر بنانے کا منصوبہ
• حادثات میں جاں بحق افراد کے لواحقین کو فوری دیت کی فراہمی پر اتفاق
• میرج ہالز کے لیے مناسب پارکنگ لازمی قرار، بغیر پارکنگ کے میرج ہال کی اجازت نہیں ہوگی
• کم عمر ڈرائیونگ کے خلاف سخت کریک ڈاؤن کا فیصلہ
• انڈرایج ڈرائیونگ کی صورت میں گاڑی کے مالک کو 6 ماہ تک قید ہوسکتی ہے
• پنجاب بھر میں بس کی چھت پر سواریاں بٹھانے پر مکمل پابندی اور کریک ڈاؤن
• لاہور کی پانچ ماڈل سڑکوں پر چنگ چی رکشوں پر مکمل پابندی عائد
وزیراعلیٰ مریم نواز نے کہا کہ لاہور سمیت تمام شہروں میں ٹریفک کے مسائل فوری حل کرنا ہوں گے، کسی کے ساتھ امتیاز نہیں برتا جائے گا اور خلاف ورزی پر ہر شخص کو جرمانہ دینا پڑے گا۔
انہوں نے مزید کہا کہ دوسرے شہروں کو تیز رفتاری سے جلد پہنچنے والے ڈرائیورز کو کارروائی کا سامنا کرنا ہوگا۔ ٹریفک پولیس کو آخری چانس دیتے ہوئے وزیراعلیٰ نے واضح کیا کہ اگر کارکردگی بہتر نہ ہوئی تو نیا ڈیپارٹمنٹ تشکیل دینا پڑے گا۔
مریم نواز نے کہا:
“ہر چیز درست کردی مگر ٹریفک کا برا حال ہے، مسلسل بے ہنگم ٹریفک ریاستی رٹ کو کمزور کرنے کے مترادف ہے۔”
وزیراعلیٰ پنجاب نے لاہور میں ٹریفک کی صورتحال بہتر بنانے کے لیے 30 دن کی فیصلہ کن ڈیڈ لائن مقرر کردی ہے.