لاہور: وزیر اطلاعات و ثقافت پنجاب عظمیٰ بخاری نے پنجاب اسمبلی ٹاک میں اہم سیاسی اور قومی امور پر گفتگو کی۔ انہوں نے کہا کہ پیپلز پارٹی حکومت کی اہم اتحادی جماعت ہے اور جہاں ممکن ہوا انہیں مکمل طور پر اکاموڈیٹ کیا جائے گا۔
عظمیٰ بخاری نے خیبر پختونخوا حکومت اور وزیراعلیٰ پر سخت تنقید کرتے ہوئے کہا کہ “مجھے کے پی کے عوام سے دلی افسوس ہے کہ ان کا وزیر اعلیٰ صرف اڈیالہ کا مجاور بننے کےلیے بنا ہے۔ کے پی کے عوام کی مشکلات سے انہیں کوئی دلچسپی نہیں۔”
انہوں نے مزید کہا کہ اگر کے پی کے وزیر اعلیٰ وفاق میں مہمان بن کر آئیں تو خوش آمدید، لیکن اگر جلوس کی نیت سے آئے تو معاملہ مختلف ہوگا۔
وزیر اطلاعات نے کہا کہ “اڈیالہ سے کبھی خیر کی خبر نہیں آتی، جو بھی آتی ہے وہ ملک کے خلاف ہی ہوتی ہے۔”
بھارت کی حالیہ جارحانہ پالیسیوں پر بات کرتے ہوئے انہوں نے کہا کہ بھارت آج بھی اپنے 8 گرے رافیل طیاروں کی وضاحت دینے میں ناکام رہا ہے۔
انہوں نے کہا کہ بھارت پاکستان کے خلاف پراکسی وار لڑ رہا ہے لیکن جب بھی پاکستان اسے بے نقاب کرتا ہے، بھارت پیچھے ہٹ جاتا ہے۔
عظمیٰ بخاری کا کہنا تھا کہ پاکستان کی بہتر خارجہ پالیسی کے باعث بھارت آکسفورڈ یونیئن کے مباحثے سے بھاگنے پر مجبور ہوا۔
پی ٹی آئی اور جماعت اسلامی کے احتجاج کے اعلان پر ردعمل دیتے ہوئے انہوں نے کہا کہ “پی ٹی آئی کے ساتھ مل کر جماعت اسلامی نے بھی جو احتجاج کا نمک حکومت پر ڈالنا ہے، شوق سے ڈالیں۔”
وزیر اطلاعات پنجاب نے کہا کہ حکومت عوامی مسائل کے حل پر توجہ دے رہی ہے اور کسی انتشار کی سیاست سے دباؤ میں نہیں آئے گی.