انسداد دہشت گردی عدالت (اے ٹی سی) راولپنڈی میں پاکستان تحریک انصاف کے بانی عمران خان سے ملاقات اور شوکت خانم اسپتال کے اکاؤنٹ ڈی فریز کرنے سے متعلق دو درخواستوں پر سماعت ہوئی، تاہم پی ٹی آئی کی جانب سے کوئی وکیل عدالت میں پیش نہ ہوا۔
گزشتہ روز علیمہ خان اور سلمان اکرم راجہ نے دونوں درخواستیں جلد سماعت کے لیے دائر کی تھیں، جس پر عدالت نے فریقین کو آج کے لیے نوٹس جاری کیے تھے۔ لیکن سماعت کے وقت پی ٹی آئی کا کوئی وکیل عدالت میں موجود نہ تھا۔
پراسیکیوشن ٹیم اور عدالت وکلا کا انتظار کرتی رہی
اے ٹی سی کے جج امجد علی شاہ اور پراسیکیوشن ٹیم طویل وقت تک پی ٹی آئی وکلا کا انتظار کرتے رہے۔
اسپیشل پراسیکیوٹر ظہیر شاہ نے عدالت میں مؤقف اختیار کیا کہ:
• بانی پی ٹی آئی کا کوئی وکیل پیش نہیں ہوا
• سوشل میڈیا پر عدالت سے متعلق پروپیگنڈا کیا جاتا ہے مگر عدالت میں کوئی نہیں آتا
• کل ہی درخواستیں دائر کی گئیں اور اسی روز نوٹس بھی جاری ہوا، لیکن آج وکلا غیر حاضر ہیں
• اگر عدالت پیش نہیں ہونا تو درخواستیں کیوں دائر کی جاتی ہیں؟
سماعت ملتوی
عدالت نے پی ٹی آئی کی جانب سے عدم حاضری کے باعث علیمہ خان اور سلمان اکرم راجہ کی دونوں درخواستوں پر سماعت یکم دسمبر تک ملتوی کردی۔
