لاہور: وزیراعلیٰ پنجاب مریم نواز شریف کی زیر صدارت اہم اجلاس میں ’وزیراعلیٰ پنجاب اعزازیہ کارڈ برائے امام مسجد صاحب‘ کی باقاعدہ منظوری دے دی گئی۔ حکومت نے فروری 2026ء تک اعزازیہ کارڈ کے اجراء کی ڈیڈ لائن مقرر کر دی ہے۔
وزیراعلیٰ مریم نواز شریف نے ہدایت کی کہ یکم جنوری 2026ء سے آئمہ کرام کو ادائیگی کا آغاز کیا جائے گا، جس کے پہلے مرحلے میں پے آرڈرز جاری کیے جائیں گے۔ جبکہ یکم فروری 2026ء سے تمام ادائیگیاں نئے اعزازیہ کارڈ کے ذریعے کی جائیں گی۔
آئمہ کرام کی رجسٹریشن اور تصدیق کا عمل
پنجاب بھر میں اب تک 62,994 آئمہ کرام کے رجسٹریشن فارم موصول ہو چکے ہیں، جبکہ تصدیق کا عمل جاری ہے۔ وزیراعلیٰ نے ہدایت کی کہ آئمہ کرام کی رجسٹریشن کا عمل مسلسل جاری رکھا جائے۔
مزید یہ بھی فیصلہ کیا گیا کہ
• ملک و قوم کے مفادات کے خلاف سرگرمیوں اور
• کسی بھی اخلاقی یا مالی جرم میں ملوث امام مسجد کا اعزازیہ فوراً بند کر دیا جائے گا۔
مسجد مینجمنٹ کمیٹیوں کا قیام
اجلاس میں صوبے بھر کی مساجد کے لیے مسجد مینجمنٹ کمیٹیاں اور تحصیل مینجمنٹ کمیٹیاں قائم کرنے کی منظوری بھی دی گئی۔ وزیراعلیٰ نے اسسٹنٹ کمشنرز کو ہدایت کی کہ وہ ہر ماہ آئمہ کرام کو بلا کر اجلاس منعقد کریں تاکہ ان کے مسائل براہِ راست سنے اور حل کیے جا سکیں۔
سیکیورٹی اور امن عامہ سے متعلق فیصلے
اجلاس میں امن و امان کی صورتحال پر تفصیلی بریفنگ بھی دی گئی۔ وزیراعلیٰ مریم نواز شریف نے حساس علاقوں میں کومبنگ آپریشنز مسلسل جاری رکھنے کی ہدایت کی۔
مزید براں، اجلاس میں یہ اہم فیصلے کیے گئے:
• سیف سٹی کیمروں اور سرکاری املاک کو نقصان پہنچانے والوں کے خلاف سخت کارروائی کے لیے نئی قانون سازی کی منظوری۔
• فورتھ شیڈول میں شامل جرائم پیشہ افراد کی ڈیجیٹل نگرانی مزید مؤثر بنانے کی ہدایت۔
• صوبے میں غیر قانونی طور پر مقیم افغان باشندوں کے خلاف آپریشن جاری رکھنے کا حکم۔
اجلاس میں مختلف محکموں نے بریفنگ دی، جبکہ وزیراعلیٰ مریم نواز شریف نے متعلقہ اداروں کو فیصلوں پر فوری عملدرآمد یقینی بنانے کی ہدایت جاری کی.