پاکستان اور کرغزستان کے درمیان توانائی، تجارت اور مختلف شعبوں میں تعاون کے 15 معاہدوں اور مفاہمت کی یادداشتوں (MoUs) پر دستخط ہوگئے۔ یہ اہم پیش رفت کرغزستان کے صدر صادر جپاروف کے دو روزہ سرکاری دورہ پاکستان کے دوران سامنے آئی۔
وزیراعظم ہاؤس پہنچنے پر کرغزستان کے صدر کا شاندار استقبال کیا گیا اور انہیں گارڈ آف آنر پیش کیا گیا۔ اس موقع پر وزیراعظم شہباز شریف سے ان کی ملاقات ہوئی، جس میں فیلڈ مارشل عاصم منیر نے بھی شرکت کی۔
دوطرفہ تعاون پر تفصیلی گفتگو
ملاقات میں وزیراعظم شہباز شریف نے پاکستان کی ’’وژن سینٹرل ایشیا‘‘ پالیسی کو مزید فروغ دینے کے عزم کا اظہار کیا۔ دونوں رہنماؤں نے تعلقات کو وسعت دینے کی ضرورت پر اتفاق کیا جبکہ دوطرفہ تجارت اور سرمایہ کاری بڑھانے پر بھی مکمل ہم آہنگی ظاہر کی۔
روڈ کوریڈور کے فعال ہونے پر دونوں ممالک نے اطمینان کا اظہار کیا۔
علاقائی امن پر اتفاق
ملاقات میں اس بات پر اتفاق ہوا کہ تمام تنازعات کو بین الاقوامی قانون اور یو این چارٹر کے مطابق پُرامن طریقے سے حل کیا جانا چاہیے۔ اس موقع پر افغانستان میں دیرپا امن اور افغان عوام کے روشن مستقبل پر بھی بات چیت ہوئی۔
کرغز صدر کا بیان
صدر صادر جپاروف نے پاکستان کو قابلِ اعتماد دوست قرار دیتے ہوئے کہا کہ دونوں ممالک کی توانائی ضروریات پوری کرنے کے لیے کاسا 1000 منصوبہ کلیدی اہمیت رکھتا ہے۔ انہوں نے کہا کہ پاکستان اور کرغزستان دہشت گردی کے خاتمے کے لیے پُرعزم ہیں۔
معاہدوں پر دستخط
بعد ازاں دونوں ممالک کے درمیان توانائی، تجارت، سرمایہ کاری، تعلیم، ٹرانسپورٹ اور دیگر اہم شعبوں میں 15 معاہدوں اور مفاہمت کی یادداشتوں پر دستخط ہوئے۔
واضح رہے کہ کرغزستان کے صدر صادر جپاروف گزشتہ روز دو روزہ دورے پر اسلام آباد پہنچے تھے، جہاں صدر آصف زرداری اور وزیراعظم شہباز شریف نے ان کا استقبال کیا تھا.