وزیراعظم شہباز شریف نے فیلڈ مارشل سید عاصم منیر کو چیف آف ڈیفنس فورسز مقرر ہونے پر مبارکباد دیتے ہوئے ان کے لیے نیک خواہشات کا اظہار کیا ہے۔ وزیراعظم ہاؤس سے جاری اعلامیے کے مطابق وزیراعظم نے کہا کہ فیلڈ مارشل عاصم منیر کی بطور چیف آف ڈیفنس فورسز تعیناتی عصری اور جدید جنگی تقاضوں سے ہم آہنگ فیصلہ ہے، جس سے ملک کا دفاع مزید مضبوط ہوگا۔
وزیراعظم نے کہا کہ فیلڈ مارشل سید عاصم منیر کی قیادت میں پاکستان کی بہادر مسلح افواج نے دشمن کو عبرتناک شکست دی اور معرکۂ حق میں شاندار کامیابی حاصل کر کے پاکستان کا نام دنیا بھر میں روشن کیا۔
ایئر چیف کو بھی مبارکباد
وزیراعظم شہباز شریف نے چیف آف ائیر اسٹاف ائر چیف مارشل ظہیر احمد بابر سدھو کو مدتِ ملازمت میں دو سال کی توسیع پر بھی مبارکباد دیتے ہوئے کہا کہ ان کی قیادت میں پاک فضائیہ نے دشمن کے جنگی طیارے تباہ کیے اور معرکۂ حق میں دشمن پر اپنی دھاک بٹھائی۔
تمام اداروں کے یکجہتی سے کام کرنے پر زور
وزیراعظم نے اس عزم کا اظہار کیا کہ پاکستان کے دفاع، ترقی اور خوشحالی کے لیے تمام ادارے مل کر کام کریں گے اور ملک کے دفاع کو مل کر ناقابلِ تسخیر بنایا جائے گا۔
صدر مملکت کی منظوری
واضح رہے کہ گزشتہ روز صدر آصف علی زرداری نے فیلڈ مارشل سید عاصم منیر کی بطور چیف آف آرمی اسٹاف اور چیف آف ڈیفنس فورسز جبکہ ائیرچیف مارشل ظہیر احمد بابر سدھو کی مدت ملازمت میں دو سال کی توسیع کی منظوری دی تھی.
