وزیر اطلاعات پنجاب عظمیٰ بخاری نے کہا ہے کہ اڈیالہ جیل کی دیواروں نے اُس شخص کو ذہنی مریض بنا دیا ہے ، اڈیالا کا قیدی بانی ایم کیو ایم پارٹ 2 بن چکا ہے۔
لاہور میں میڈیا سے گفتگو میں عظمیٰ بخاری کا کہناتھا کہ اڈیالہ جیل کی دیواروں نے اس شخص کو ذہنی مریض بنا دیا ہے، بانی پی ٹی آئی اپنے دور میں مخالفین کو دھمکیاں لگاتے تھے، بانی پی ٹی آئی نے پاکستان کو دیوالیہ کروانے کیلئے ہر حربہ استعمال کیا، پاکستان کیلئے ہر اچھی خبر فتنہ فساد کیلئے بری خبر ہے۔
انہوں نے کہا کہ اڈیالا کا قیدی بانی متحدہ پارٹ 2 بن چکا ہے، دھمکیاں دینے والا آج مظلوم بننے کی کوشش کر رہا ہے، بانی پی ٹی آئی کا ذہنی کیفیت کامعائنہ کیا جائے، اب یہ پاکستان کے خلاف بھارتی میڈیا کو استعمال کر رہے ہیں، سوشل میڈیا پر چلا کہ بانی پی ٹی آئی کی طبیعت ناساز ہے، وہ ہٹا کٹا ہے اور باہر سے فرائی فش بھی منگوا کر کھاتا ہے۔
عظمیٰ بخاری کا کہناتھاکہ نمل یونیورسٹی آج بھی چندے کے پیسے سے چل رہی ہے، سہیل آفریدی کو خود نہیں پتہ 53 سو ارب ہوتا کیا ہے، موصوف جلسے میں کرپشن کی بات کر رہے تھے، آئی ایم ایف کی رپورٹ میں یہ نہیں کہ رقوم چوری ہوئیں یا کرپشن میں گئیں، ان کو اپنے قائد کو صادق وامین کہتے ہوئے شرم بھی نہیں آتی۔
فتنہ خان کی سیاست اور پاکستان ایک ساتھ نہیں چل سکتے ، بانی پی ٹی آئی پہلے بھی اور آج بھی پاکستان کیلئے خطرہ ہیں، دوسروں کا اے سی اتروانے والا مظلوم بنا ہوا ہے جو ٹوٹل ڈرامہ ہے، ڈی جی آئی ایس پی آر کی پریس کانفرنس سے ان کی دموں پر زور سے پاؤں آیا ہے، گندے گھناؤنے کردار کے مالک کو مقبول لیڈر کہتے ہیں، جلسہ جلوس تو ان کے پلے میں نہیں رہا۔
جیل میں بیٹھا شخص بالکل ٹھیک ہے، پاکستان کے خلاف کھلواڑ نہیں چل سکتا ہے، ہم نے کبھی بھی یہ نہیں کہا کہ سو فیصد فرشتے اکٹھے ہو گئے ہیں، پی ٹی آئی کے بہت سے لوگ بانی پی ٹی آئی سے تنگ ہیں۔