اسلام آباد: وزیراعظم شہباز شریف نے کہا ہے کہ ملک جادو ٹونے سے نہیں بلکہ محنت اور مسلسل جدوجہد سے ترقی کرے گا۔ ان کا کہنا تھا کہ دہشت گردی اور معاشی ترقی ایک ساتھ نہیں چل سکتیں۔
وزیراعظم نے یہ بات اسلام آباد میں علما کنونشن سے خطاب کرتے ہوئے کہی، جس میں چیف آف ڈیفنس فورسز فیلڈ مارشل سید عاصم منیر نے بھی شرکت کی۔
شہباز شریف نے کہا کہ قوم میں یکجہتی کی فضا قائم ہونے تک حقیقی ترقی ممکن نہیں۔ انہوں نے دعویٰ کیا کہ پاکستان کی معیشت تیزی سے بحالی اور ترقی کے راستے پر گامزن ہے۔ ان کا کہنا تھا کہ اگر افواجِ پاکستان کی قربانیوں کا مذاق اڑایا جائے گا تو دنیا پاکستان کی عزت کیسے کرے گی؟
وزیراعظم نے زور دیا کہ افواجِ پاکستان کے خلاف زہر آلود پروپیگنڈے کا مقابلہ کرنا حکومت، علما اور پوری قوم کی ذمہ داری ہے۔ انہوں نے کہا کہ معرکۂ حق میں قوم کی دعائیں قبول ہوئیں اور افواج کے ہر سپاہی نے بے مثال کردار ادا کیا۔
اپنے خطاب میں شہباز شریف نے کہا کہ فیلڈ مارشل عاصم منیر نے بھارت کے خلاف جنگ کو جرات سے لیڈ کیا اور مسلح افواج کی بہادری سے دشمن کو عبرتناک شکست ہوئی۔ انہوں نے مزید کہا کہ ملک کو دیوالیہ ہونے سے بچانے میں سیاسی و عسکری قیادت نے اہم کردار ادا کیا۔
وزیراعظم نے ملک میں فرقہ واریت کے خاتمے پر زور دیتے ہوئے کہا کہ آج بھی بعض مکاتب فکر ایک دوسرے کے پیچھے نماز پڑھنے سے گریز کرتے ہیں۔ انہوں نے کہا کہ خوارج کے حملوں میں معصوم پاکستانی شہید ہو رہے ہیں، اور شہدا اپنی جانیں دے کر کئی بچوں کو یتیم ہونے سے بچا رہے ہیں۔
خطاب کے اختتام پر وزیراعظم نے اتحاد، امن اور استحکام کو پاکستان کی ترقی کی بنیادی شرط قرار دیا.
