سیالکوٹ: وزیر دفاع خواجہ محمد آصف نے کہا ہے کہ کچھ سازشی عناصر آج بھی بانی پی ٹی آئی عمران خان کو دوبارہ اقتدار میں لانے کی کوشش کر رہے ہیں۔ ان کا کہنا تھا کہ سابق ڈی جی آئی ایس آئی فیض حمید بانی پی ٹی آئی پراجیکٹ کے اصل انچارج تھے اور اسی منصوبے کے تحت عمران خان کو اقتدار میں لایا گیا۔
سیالکوٹ میں میڈیا سے گفتگو کرتے ہوئے خواجہ آصف نے الزام لگایا کہ فیض حمید جب کور کمانڈر پشاور تھے تو انہوں نے عمران خان کی سیاست کو تقویت دی، جبکہ دھاندلی کے ذریعے، فیض حمید کی نگرانی میں بانی پی ٹی آئی کو اقتدار میں لایا گیا۔ انہوں نے کہا کہ اس پراجیکٹ میں دیگر شخصیات بھی شامل رہیں۔
وزیر دفاع کا کہنا تھا کہ بانی پی ٹی آئی نے چار سال تک ملک کے ساتھ کھلواڑ کیا، جس کے ذمہ دار فیض حمید اور عمران خان دونوں ہیں۔ انہوں نے کہا کہ عوام جانتے ہیں کہ بانی پی ٹی آئی نے کیا ڈیلیور کیا، ان کے دور میں پارلیمنٹ کو آئی ایس آئی کا ذیلی ادارہ بنا دیا گیا۔
خواجہ آصف نے دعویٰ کیا کہ 9 مئی کے واقعات بانی پی ٹی آئی کے لیے برپا کیے گئے اور اس کی منصوبہ بندی فیض حمید نے کی۔ ان کے مطابق تمام مخالفین کو فیض حمید کے ذریعے جیلوں میں ڈالا گیا اور وہ ملک کے ساتھ نہایت بھیانک کھیل کھیلتے رہے۔
انہوں نے کہا کہ 9 مئی کی تباہی فیض حمید اور بانی پی ٹی آئی کا مشترکہ منصوبہ تھی، اور اگر دونوں کا گٹھ جوڑ قائم رہتا تو ملک کو ناقابلِ تلافی نقصان پہنچتا۔ ان کا کہنا تھا کہ جن لوگوں نے پاکستان کے ساتھ دشمنی کی ہے، انہیں انجام تک پہنچانا ضروری ہے۔
وزیر دفاع نے کہا کہ احتساب صرف ایک فرد کا نہیں بلکہ بیوروکریسی اور دیگر اداروں میں چھپے عناصر کا بھی ہونا چاہیے۔ انہوں نے بتایا کہ فوج نے خود فیض حمید کا ٹرائل کیا اور 15 ماہ کے عرصے میں مقدمہ چلا کر سزا سنائی گئی۔
خواجہ آصف نے کہا کہ 9 مئی کو افواج پاکستان اور شہدا کی یادگاروں کی بے حرمتی کی گئی، جبکہ یہی افواج بعد ازاں آپریشن بنیان مرصوص میں قوم کا سر فخر سے بلند کرنے کا سبب بنیں۔ انہوں نے کہا کہ اگر فیض حمید اور بانی پی ٹی آئی کا منصوبہ کامیاب ہو جاتا تو حالات انتہائی خطرناک ہو سکتے تھے۔
انہوں نے کہا کہ پاکستان کی نئی تاریخ مئی میں رقم ہوئی اور ہمیں اس تاریخ پر فخر ہے۔ اگر سازشی عناصر کو انجام تک نہ پہنچایا گیا تو یہ ملک کے حق میں بہتر نہیں ہوگا۔
وزیر دفاع نے کہا کہ فیض حمید کو سزا کے خلاف اپیل کا حق حاصل ہے، تاہم نواز شریف کو ایسی سہولت میسر نہیں تھی۔ انہوں نے کہا کہ شہباز شریف نے ملک کو مشکل حالات سے نکالا اور فوجی قیادت نے سویلین حکومت کا بھرپور ساتھ دیا۔
خواجہ آصف نے مزید کہا کہ فیض حمید کے خلاف مزید چارجز بھی ہیں، جن میں 9 مئی کا مقدمہ شامل ہے، جبکہ سیاست میں ایسے لوگ آج بھی موجود ہیں جو ماضی میں سازشوں کا حصہ تھے، ان کا بھی احتساب ہونا چاہیے۔
انہوں نے نیب کے کردار پر بات کرتے ہوئے کہا کہ ماضی میں نیب کو سیاسی انتقام کے لیے استعمال کیا گیا۔ انہیں نواز شریف کے خلاف بیان دینے پر دباؤ ڈالا گیا، انکار پر قید کا سامنا کرنا پڑا، مگر انہوں نے مؤقف اختیار کیا کہ وہ نواز شریف کا ساتھ نہیں چھوڑ سکتے.