آئی ایم ایف کا بےنظیر انکم سپورٹ پروگرام کا بجٹ بڑھانے پر اظہارِ اطمینان، امداد میں مزید اضافے کا مطالبہ

اسلام آباد: عالمی مالیاتی فنڈ (آئی ایم ایف) نے بےنظیر انکم سپورٹ پروگرام (بی آئی ایس پی) کے بجٹ میں اضافے پر اطمینان کا اظہار کرتے ہوئے پروگرام کے تحت دی جانے والی امداد میں مزید اضافے کا مطالبہ کیا ہے۔

آئی ایم ایف حکام کے مطابق انکم سپورٹ پروگرام کے بجٹ کو مزید مضبوط کیا گیا ہے، تاہم بین الاقوامی معیار کے مقابلے میں بےنظیر کفالت پروگرام کے تحت دی جانے والی رقم اب بھی کم ہے۔ حکام کا کہنا ہے کہ صارفین کی قوتِ خرید برقرار رکھنے کے لیے مراعات میں مناسب اضافہ ضروری ہے۔

آئی ایم ایف کی رپورٹ کے مطابق کفالت پروگرام کے تحت امداد کو کم آمدنی والے طبقے کی کھپت کے 15 فیصد تک لے جانے کی تجویز دی گئی ہے، جبکہ کفالت پروگرام کی رقم کو افراطِ زر کے مطابق ایڈجسٹ کرنے کی بھی سفارش کی گئی ہے۔

رپورٹ میں بتایا گیا ہے کہ بی آئی ایس پی کے بجٹ میں امدادی پروگراموں پر اخراجات میں 20 فیصد اضافہ شامل ہے، جس کے نتیجے میں کفالت پروگرام کے تحت نقد امداد میں اضافہ کیا جانا چاہیے۔

عالمی مالیاتی ادارے نے سفارش کی ہے کہ غیر مشروط نقد امداد کی رقم 13 ہزار 500 روپے سے بڑھا کر 14 ہزار 500 روپے کی جائے، جبکہ کفالت پروگرام کی کوریج میں کم از کم 2 لاکھ خاندانوں کا اضافہ کیا جائے۔

آئی ایم ایف کے مطابق مالی سال 2026 کے اختتام تک کفالت پروگرام سے مستفید خاندانوں کی تعداد 10.2 ملین تک پہنچ جائے گی، جبکہ 2026 میں نئے گھریلو سروے کے بعد کفالت پروگرام کی امداد میں مزید اضافہ کیا جانا چاہیے۔

اس کے علاوہ آئی ایم ایف نے کنڈیشنل کیش ٹرانسفر پروگرام کی کوریج میں توسیع کی بھی سفارش کی ہے اور کہا ہے کہ بی آئی ایس پی کے کنڈیشنل کیش ٹرانسفر پروگرام کے لیے مختص بجٹ کا مکمل اور مؤثر استعمال نہایت اہم ہے.