اسلام آباد: وزیراعظم محمد شہباز شریف کی زیر صدارت دانش یونیورسٹی کے بورڈ آف ٹرسٹیز کا اجلاس منعقد ہوا، جس میں وزیراعظم نے بورڈ کے چیئرمین اور اراکین کو خوش آمدید کہتے ہوئے ان کے لیے نیک تمناؤں کا اظہار کیا۔
اجلاس سے خطاب کرتے ہوئے وزیراعظم نے کہا کہ بورڈ آف ٹرسٹیز کی کاوشیں علم کی روشنی پھیلانے اور ملک میں اعلیٰ تعلیم کے فروغ میں اہم کردار ادا کریں گی۔ انہوں نے کہا کہ دانش یونیورسٹی ٹیکنالوجی اور جدید علوم کے فروغ پر خصوصی توجہ مرکوز کرے گی تاکہ طلباء کو عصرِ حاضر کے تقاضوں سے ہم آہنگ تعلیم فراہم کی جا سکے۔
وزیراعظم نے دانش یونیورسٹی کی عمارت کو سادہ، باوقار اور معیاری طرزِ تعمیر کے مطابق تعمیر کرنے کی ہدایت کی۔ انہوں نے یونیورسٹی میں اعلیٰ معیار کی ریسرچ اور بہترین فیکلٹی کی تعیناتی کے لیے جامع حکمت عملی تیار کرنے پر زور دیا۔
وزیراعظم نے دانش یونیورسٹی کی تعمیر کے لیے اچھی شہرت اور متعلقہ تجربہ رکھنے والے کنٹریکٹرز کو پری کوالیفائی کرنے کی بھی ہدایت دی۔ اس کے علاوہ انہوں نے داخلوں کے حوالے سے ملک کے دور دراز علاقوں، گلگت بلتستان اور آزاد جموں و کشمیر کے لائق اور مستحق طلباء کو خصوصی مواقع فراہم کرنے کی ہدایت کی۔
وزیراعظم نے سرکاری اسکولوں میں دانش یونیورسٹی کے حوالے سے آگہی مہم چلانے کی بھی ہدایت کی تاکہ زیادہ سے زیادہ مستحق طلباء اس تعلیمی منصوبے سے مستفید ہو سکیں۔
اجلاس کو دانش یونیورسٹی سے متعلق جاری امور پر بریفنگ دی گئی، جس میں بتایا گیا کہ دانش یونیورسٹی کے لیے پراجیکٹ مینجمنٹ یونٹ قائم کر دیا گیا ہے۔ بریفنگ کے مطابق دانش یونیورسٹی کا چارٹر وزارت قانون و انصاف سے منظور ہو چکا ہے اور جلد منظوری کے لیے کابینہ اور پارلیمنٹ کو ارسال کیا جائے گا۔
مزید بتایا گیا کہ دانش یونیورسٹی کے حوالے سے ملک بھر میں آؤٹ ریچ پروگرام کا آغاز کیا جا رہا ہے جبکہ ابتدائی مرحلے میں عصری تقاضوں سے ہم آہنگ سینٹر آف ایکسیلینس قائم کیے جائیں گے۔ ملک بھر کے مستحق طلباء کے لیے داخلوں کے حوالے سے ٹریننگ کیمپس بھی شروع کیے جائیں گے۔
بریفنگ میں یہ بھی بتایا گیا کہ یونیورسٹی کے تعلیمی وژن کے لیے بین الاقوامی شہرت یافتہ ماہرین تعلیم سے رابطہ کیا جا چکا ہے۔
اجلاس میں وفاقی وزیر تعلیم و فنی تربیت ڈاکٹر خالد مقبول صدیقی، وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، دانش یونیورسٹی کے بورڈ آف ٹرسٹیز کے چیئرمین، اراکین اور متعلقہ اعلیٰ سرکاری حکام نے شرکت کی۔
