لاہور: وزیراعلیٰ پنجاب مریم نواز شریف سے جمہوریہ ماریشس کے ہائی کمشنر ایچ ای مسٹر منسو کرمباکس نے ملاقات کی۔ وزیراعلیٰ نے ماریشس کے سفیر کا پرتپاک خیرمقدم کیا اور دونوں رہنماؤں کے درمیان دوطرفہ تعلقات، تجارتی تعاون اور سرمایہ کاری کے فروغ پر تفصیلی تبادلۂ خیال کیا گیا۔
ملاقات کے دوران بزنس ٹو بزنس روابط، تجارتی وفود کے تبادلے اور نمائشوں کے انعقاد کی اہمیت پر زور دیا گیا۔ وزیراعلیٰ مریم نواز شریف نے ماریشس کے ساتھ تجارتی اور معاشی تعاون کو مزید مضبوط بنانے کے عزم کا اظہار کیا اور کہا کہ پاکستان اور ماریشس کے درمیان ثقافتی تعلقات اور باہمی احترام پر مبنی دیرینہ دوستانہ روابط موجود ہیں۔
وزیراعلیٰ نے کہا کہ تعلیم، سیاحت، زراعت اور عوامی تبادلوں کے شعبوں میں تعاون کو مزید وسعت دی جا سکتی ہے۔ دونوں فریقین نے حلال فوڈ، ٹیکنالوجی اور ہیومن ریسورس کے شعبوں میں تعاون بڑھانے پر بھی اتفاق کیا۔
مریم نواز شریف نے بلیو اکانومی کے شعبے میں سرمایہ کاری کے لیے ہر ممکن تعاون کی یقین دہانی کراتے ہوئے کہا کہ ماریشس کے لیے چاول، ٹیکسٹائل اور فارماسیوٹیکل مصنوعات کی برآمدات میں مزید اضافہ کیا جائے گا۔ انہوں نے پیداواری کاشت، ماریشس کی زرعی ٹیکنالوجی اور شوگر انڈسٹری میں تعاون کے فروغ کے عزم کا بھی اظہار کیا۔
وزیراعلیٰ نے کہا کہ پنجاب میں زرعی پروسیسنگ، ٹیکسٹائل، فارماسیوٹیکلز اور ویلیو ایڈڈ فوڈ پروڈکٹس کے شعبوں میں شاندار مواقع موجود ہیں، جبکہ ایک لاکھ سے زائد نوجوانوں کو اسکل ڈویلپمنٹ پروگرام کے ذریعے ہنر مند افرادی قوت میں تبدیل کیا جا رہا ہے۔
انہوں نے بتایا کہ انسانی سرمائے کی ترقی، بالخصوص اعلیٰ تعلیم اور پیشہ ورانہ مہارتوں میں تعاون کے وسیع مواقع موجود ہیں، جبکہ حالیہ برسوں میں پاکستان اور ماریشس کے درمیان دوطرفہ تجارت میں حوصلہ افزا اضافہ ہوا ہے۔
وزیراعلیٰ مریم نواز شریف نے پنجاب میں سیاحت کے شعبے میں ماریشس کی سرمایہ کاری کا خیرمقدم کرتے ہوئے کہا کہ پنجاب ایک بھرپور اور متنوع سیاحتی مرکز ہے۔ اندرون لاہور، شاہی قلعہ، بادشاہی مسجد، شالیمار گارڈنز، نور محل اور دیگر مذہبی و تاریخی مقامات سیاحوں کی توجہ کا مرکز بن چکے ہیں۔
انہوں نے کہا کہ پنجاب نے تباہ کن سیلاب جیسے چیلنجز کا پامردی سے مقابلہ کیا اور اب کلائمیٹ ریزیلینٹ وژن ایکشن پلان کے تحت گرین سرمایہ کاری، ماحولیاتی تحفظ، جنگلات کے تحفظ، سبز نقل و حمل اور گرین انرجی کی جانب بتدریج منتقلی کو فروغ دیا جا رہا ہے۔
وزیراعلیٰ نے ماریشس کے ہائی کمشنر منسو کرمباکس کی نوجوانوں کی ترقی، منشیات کے خلاف کاوشوں اور تعلیمی خدمات کو سراہا اور ان کے لیے نیک خواہشات کا اظہار کیا۔
اس موقع پر ہائی کمشنر منسو کرمباکس نے کہا کہ سیاحتی سرگرمیوں کے فروغ کے ذریعے پاکستان کا حقیقی اور مثبت تشخص دنیا کے سامنے لایا جا سکتا ہے، جبکہ گنے کی پیداوار اور ویلیو ایڈیشن میں ماریشس کے تکنیکی تعاون کو مزید فروغ دیا جائے گا۔
