وزیراعظم شہباز شریف کی رحیم یار خان آمد، اماراتی صدر شیخ محمد بن زاید سے ملاقات

رحیم یار خان: وزیراعظم شہباز شریف رحیم یار خان پہنچ گئے جہاں انہوں نے متحدہ عرب امارات کے صدر شیخ محمد بن زاید النہیان سے ملاقات کی۔

وزیراعظم آفس کے مطابق یہ ملاقات رحیم یار خان میں واقع شیخ زاید پیلس میں ہوئی، جس میں نائب وزیراعظم و وزیر خارجہ اسحاق ڈار اور وفاقی وزیر اطلاعات عطا تارڑ بھی موجود تھے۔

اعلامیے کے مطابق ملاقات میں دونوں رہنماؤں نے 26 دسمبر کو اسلام آباد میں ہونے والی ملاقات پر تبادلہ خیال کیا۔ وزیراعظم شہباز شریف نے پاکستان اور متحدہ عرب امارات کے دیرینہ تعلقات کو مزید مضبوط کرتے ہوئے انہیں اسٹریٹیجک اور باہمی فائدے کی شراکت داری میں تبدیل کرنے کے عزم کا اعادہ کیا۔

وزیراعظم نے یو اے ای کے ساتھ اقتصادی شراکت داری بڑھانے اور دو طرفہ تجارت کے حجم میں اضافے کی ضرورت پر زور دیا۔ اعلامیے کے مطابق دونوں رہنماؤں نے آئی ٹی، توانائی، معدنیات اور دفاعی شعبوں میں تعاون بڑھانے پر اتفاق کیا۔

وزیراعظم شہباز شریف نے متحدہ عرب امارات کی ترقی میں صدر شیخ محمد بن زاید کی قیادت کو خراجِ تحسین پیش کیا اور یو اے ای میں مقیم 21 لاکھ پاکستانیوں کے کردار کو بھی سراہا۔

ملاقات میں دو طرفہ تعلقات کے علاوہ دیگر اہم علاقائی اور عالمی امور پر بھی تبادلہ خیال کیا گیا۔ اعلامیے کے مطابق پاکستان اور متحدہ عرب امارات کے درمیان سال بھر کی سفارتی سرگرمیوں کا اختتام اس ملاقات پر ہوا۔

واضح رہے کہ متحدہ عرب امارات کے صدر شیخ محمد بن زاید النہیان 26 دسمبر کو پاکستان پہنچے تھے اور اس وقت رحیم یار خان میں شکار کے سلسلے میں قیام پذیر ہیں۔ 27 دسمبر کو پریس بریفنگ کے دوران نائب وزیراعظم اسحاق ڈار نے بھی اس بات کی تصدیق کی تھی کہ یو اے ای کے صدر شکار کے لیے رحیم یار خان گئے ہوئے ہیں۔