وزیراعلیٰ پنجاب مریم نواز نے بطور مہمانِ خصوصی واہگہ بارڈر لاہور پر تعمیر کیے گئے جدید ایرینا کی افتتاحی تقریب میں شرکت کی اور منصوبے کا باضابطہ افتتاح کیا۔
افتتاحی تقریب میں سینئر وزیر مریم اورنگزیب، کور کمانڈر لاہور، صوبائی وزراء اور سینئر بیوروکریسی کے اعلیٰ حکام نے بھی شرکت کی۔ یہ تقریب پاکستان رینجرز (پنجاب) کے زیرِ اہتمام جوائنٹ چیک پوسٹ واہگہ پر منعقد کی گئی۔
تقریب سے متعلق بتایا گیا کہ نئے ایرینا میں شائقین کی نشستوں کی تعداد ساڑھے 7 ہزار سے بڑھا کر 25 ہزار کر دی گئی ہے، جس سے واہگہ بارڈر پر ہونے والی تقریبات کو مزید شاندار اور منظم انداز میں دیکھنے کی سہولت میسر آئے گی۔
ایرینا کی توسیع کے ساتھ ساتھ جوائنٹ چیک پوسٹ واہگہ پر متعدد نئی تعمیرات بھی مکمل کی گئی ہیں۔ ان تعمیرات میں تقسیمِ ہند کی عکاسی کرنے والا ریلوے اسٹیشن کا ماڈل، سامانِ حرب اور یادگارِ شہداء پر مشتمل تھیم پارک شامل ہیں، جو ملکی تاریخ اور قربانیوں کو اجاگر کرتے ہیں۔
ایرینا کے اندر تحریکِ آزادی سے لے کر آج تک پاکستان کی تاریخ اور ثقافت پر مبنی پاکستان میوزیم بھی قائم کیا گیا ہے۔ اس کے علاوہ اضافی دفاتر، پنجاب رینجرز کے جوانوں کے لیے بیرکس، نمازیوں کے لیے پریئر ایریا اور فوڈ کورٹس بھی تعمیر کیے گئے ہیں۔
منصوبے میں وسیع و عریض کار پارکنگ کی سہولت فراہم کی گئی ہے، جبکہ بابِ آزادی کے مقام پر شاہی قلعہ کی طرز پر عالمگیری دروازہ بھی نصب کیا گیا ہے، جو اس مقام کی تاریخی اہمیت کو مزید اجاگر کرتا ہے۔
مزید برآں، جوائنٹ چیک پوسٹ واہگہ پر نصب قومی پرچم کی بلندی 115 میٹر سے بڑھا کر 139 میٹر کر دی گئی ہے، جو اب ایشیا کا ساتواں بلند ترین اور جنوبی ایشیا کا بلند ترین قومی پرچم قرار دیا جا رہا ہے۔
افتتاحی تقریب سے خطاب کے دوران وزیراعلیٰ پنجاب مریم نواز نے کہا کہ واہگہ بارڈر قومی تشخص، حب الوطنی اور پاکستان کی ثقافت کی علامت ہے، اور حکومت پنجاب ایسے منصوبوں کے ذریعے عوام کو بہتر سہولیات فراہم کرنے کے ساتھ ساتھ قومی ورثے کو اجاگر کرنے کے لیے پرعزم ہے۔